17 August 2022

ਵਿਚਾਰ ਚਰਚਾ : ਸਿੱਧੂ ਮੂਸੇਵਾਲਾ ਦਾ ਚਰਚਾ ਅਤੇ ਉਸ ਦੀ ਗਾਇਕੀ ਦਾ ਸੰਕਟ – ਸੁਖਿੰਦਰ

ਵਿਚਾਰ ਚਰਚਾ :

ਸਿੱਧੂ ਮੂਸੇਵਾਲਾ ਦਾ ਚਰਚਾ ਅਤੇ ਉਸਦੀ ਗਾਇਕੀ ਦਾ ਸੰਕਟ

-ਸੁਖਿੰਦਰ

ਸਾਲ 2016 ਦੇ ਅਖੀਰ ਵਿੱਚ ਸਿੱਧੂ ਮੂਸੇਵਾਲਾ ਇੰਟਰਨੈਸ਼ਨਲ ਸਟੂਡੈਂਟ ਬਣਕੇ ਇੰਡੀਆ ਤੋਂ ਕੈਨੇਡਾ ਪਹੁੰਚਿਆ। ਉਸ ਨੇ ਇੱਥੇ ਆ ਕੇ ਟੋਰਾਂਟੋ ਦੇ ਹੰਬਰ ਕਾਲਜ ਵਿੱਚ ਦਾਖਲਾ ਲਿਆ ਅਤੇ ਬਰੈਂਪਟਨ ਸ਼ਹਿਰ ਵਿੱਚ ਰਹਿਣ ਲੱਗਾ। ਇੱਥੇ ਆ ਕੇ ਉਸ ਨੇ ਪੜ੍ਹਾਈ ਦੇ ਨਾਲ ਨਾਲ ਆਪਣਾ ਖਰਚਾ ਚਲਾਉਣ ਲਈ ਇੱਕ ਬੇਕਰੀ ਵਿੱਚ ਕੰਮ ਕਰਨਾ ਸ਼ੁਰੂ ਕੀਤਾ।

ਪਰ ਉਸ ਅੰਦਰ ਪੰਜਾਬੀ ਗਾਇਕੀ ਦੀ ਚਿਣਗ ਹੋਣ ਕਰਕੇ ਉਸ ਨੇ ਇੱਕ ਦੋਗਾਣਾ ਲਿਖਿਆ, ਚਰਚਿਤ ਪੰਜਾਬੀ ਗਾਇਕ ਅਮਰ ਚਮਕੀਲੇ ਵਾਂਗ, ਇਹ ਦੋਗਾਣਾ ਗਾਇਕਾ ਗੁਰਲੇਜ਼ ਅਖਤਰ ਨਾਲ ਮਿਲ ਕੇ ਗਾਇਆ, ‘ਜੀ ਵੈਗਨ’ ਨਾਮ ਹੇਠ ਇਹ ਦੋਗਾਣਾ ਰਿਕਾਰਡ ਕਰਵਾਇਆ ਅਤੇ ਰੀਲੀਜ਼ ਕੀਤਾ।

ਇਸ ਪਹਿਲੇ ਹੀ ਗੀਤ ਵਿੱਚ ਉਸ ਨੇ ਆਪਣੇ ਅਤੇ ਮਾਲਵੇ ਦੇ ਇਲਾਕੇ ਦੇ ਪੰਜਾਬੀਆਂ ਦੇ ਸੁਭਾਅ ਨੂੰ ਬਹੁਤ ਹੀ ਅੱਖੜ ਕਿਸਮ ਦੇ, ਤਾਨਾਸ਼ਾਹ, ਬੇਲਿਹਾਜ਼ ਅਤੇ ਹਥਿਆਰਾਂ ਨਾਲ ਪਿਆਰ ਕਰਨ ਵਾਲਿਆਂ ਦੇ ਰੂਪ ਵਿੱਚ ਪੇਸ਼ ਕੀਤਾ। ਉਸ ਦੀ ਇਹੀ ਅੱਖੜ ਕਿਸਮ ਦੇ ਬੰਦੇ ਵਾਲੀ ਪਹਿਚਾਣ ਉਸ ਦੇ ਅਗਲੇ ਵਧੇਰੇ ਗੀਤਾਂ ਵਿੱਚ ਵੀ ਪੇਸ਼ ਹੁੰਦੀ ਰਹੀ ਅਤੇ ਉਸ ਦਾ ਮੋਹ, ਹਥਿਆਰਾਂ ਨਾਲ ਮੋਹ ਰੱਖਣ ਵਾਲੇ, ਗੈਂਗਸਟਰਾਂ ਨਾਲ ਵੀ ਵਧਦਾ ਗਿਆ।

ਇਸੇ ਮੋਹ ਸਦਕਾ ਹੀ ਸਿੱਧੂ ਮੂਸੇਵਾਲਾ ਰੈਪ ਮਿਊਜ਼ਿਕ ਅਤੇ ਰੈਪ ਗਾਇਕਾਂ ਦੇ ਵੀ ਨੇੜੇ ਹੁੰਦਾ ਗਿਆ। ਹੌਲੀ ਹੌਲੀ ਸਿੱਧੂ ਮੂਸੇਵਾਲਾ ਦੀ ਸ਼ਮੂਲੀਅਤ ਵੀ ਰੈਪ ਗਾਇਕਾਂ ਵਿੱਚ ਹੋਣ ਲੱਗੀ ਅਤੇ ਉਸ ਦੇ ਗੀਤਾਂ ਨੂੰ ਵੀ ਗੈਂਗਸਟਰ ਗੀਤ ਕਿਹਾ ਜਾਣ ਲੱਗਾ। ਉਸ ਦਾ ਕਤਲ ਹੋ ਜਾਣ ਤੋਂ ਬਾਅਦ ਸਿੱਧੂ ਮੂਸੇਵਾਲਾ ਦਾ ਨਾਮ ਵੀ ਦੁਨੀਆ ਭਰ ਦੇ ਉਨ੍ਹਾਂ 77 ਰੈਪ ਗਾਇਕਾਂ ਦੀ ਲਿਸਟ ਵਿੱਚ ਸ਼ਾਮਲ ਕੀਤਾ ਗਿਆ ਜੋ ਕਿ ਪਿਛਲੇ 25 ਸਾਲਾਂ ਵਿੱਚ, ਕਿਸੇ ਨ ਕਿਸੇ ਕਾਰਨ, ਗੋਲੀਆਂ ਮਾਰ ਕੇ ਕਤਲ ਕਰ ਦਿੱਤੇ ਗਏ ਹਨ।

ਪੇਸ਼ ਹਨ ਸਿੱਧੂ ਮੂਸੇਵਾਲਾ ਦੇ ਪਹਿਲੇ ਗੀਤ ‘ਜੀ ਵੈਗਨ’ ਵਿੱਚੋਂ ਜ਼ਿਕਰਯੋਗ ਤਿੰਨ ਪਹਿਰੇ; ਤਾਂ ਕਿ ਉਸ ਦੀ ਗਾਇਕੀ ਦੇ ਮੁੱਢਲੇ ਸੁਭਾਅ ਬਾਰੇ ਜਾਣਿਆ ਜਾ ਸਕੇ:

ਗੀਤ :
ਜੀ ਵੈਗਨ
1।
ਓ ਜਿੱਥੇ ਖੱਬੀ ਖ਼ਾਨ ਨੇ ਘਰਾਣੇ ਬੱਲੀਏ
ਵੈਲੀਆਂ ਦੇ ਵੱਢ ਖਾਣੇ ਲਾਣੇ ਬੱਲੀਏ
ਰੱਖ ਕਿਰਪਾਨਾਂ ਉੱਤੇ ਖਾਂਦੇ ਰੋਟੀਆਂ
ਓਥੋਂ ਦੇ ਨਿਆਣੇ ਕੀ ਸਿਆਣੇ ਬੱਲੀਏ
ਓ ਜੀਹਦੇ ਉੱਤੇ ਅੱਖ ਉਹ ਅਜੀਬ ਕਰਦੇ
ਅੜੀ ਦੀ ਗਵਾਹੀ ਸਾਰਾ ਜੱਗ ਭਰਦਾ
2।
ਓ ਮਾਲਵਾ ਬੈਲਟ ਵਿੱਚ ਪੈਂਦੇ ਜੱਟਾਂ ਦੀ
ਦੇਖ ਤੂੰ ਕੈਨੇਡਾ ਤੱਕ ਪੈਂਦੀ ਧਾਕ ਨੀ
ਤੂੰ ਜਿਹੜੀਆਂ ਦੁਨਾਲੀਆਂ ਦੀ ਗੱਲ ਕਰਦੀ
ਸਾਡੇ ਪਿੰਡ ਚੱਕੀ ਫਿਰਦੇ ਜਵਾਕ ਨੀ
ਉਹ ਬਾਡੀ ਦਾ ਬਣਾ ਦਿੰਦੇ ਰੌਸ਼ਨਦਾਨ ਨੀ
ਓ ਲੰਡੂ ਬੰਦਾ ਜੇ ਕੋਈ ਵਾਧੂ ਸਿਰ ਚੱਕ ਦਾ
ਓ ਜਿੱਥੇ ਬੰਦਾ ਮਾਰ ਕੇ ਕਸੂਰ ਪੁੱਛਦੇ
ਜੱਟ ਓਸ ਪਿੰਡ ਤੋਂ ਬਿਲੋਂਗ ਕਰਦਾ
3।
ਓ ਪਿੰਡ ਮੇਰਾ ਮੂਸਾ ਮਾਨਸਾ ਦਾ ਏਰੀਆ
ਦੱਸ ਦੇਵੀਂ ਵੀਰਾਂ ਨੂੰ ਤੂੰ ਜਿੱਥੇ ਰਹਿੰਦੇ ਨੇ
ਟੋਪੀ ਵਾਲੇ ਕਿੱਲ ਠੋਕਾਂ ਸ਼ੌਂਕ ਨਾਲ ਨੀ
ਜੱਟ ਨੂੰ ਵੀ ਸਿੱਧੂ ਮੂਸੇਵਾਲਾ ਕਹਿੰਦੇ ਨੇ
ਓ ਤਾਨਾਸ਼ਾਹ ਅਸੂਲ ਤੇ ਸੁਭਾਅ ਅੱਥਰਾ
ਪਾਉਂਦਾ ਏ ਪਟਾਕੇ ਜਿੱਥੇ ਪੈਰ ਧਰਦਾ
ਓ ਜਿੱਥੇ ਬੰਦਾ ਮਾਰ ਕੇ ਕਸੂਰ ਪੁੱਛਦੇ
ਜੱਟ ਓਸ ਪਿੰਡ ਤੋਂ ਬਿਲੋਂਗ ਕਰਦਾ

ਇੱਕ ਗੱਲ ਤਾਂ ਹੁਣ ਮੀਡੀਆ ਵਿੱਚ ਯਕੀਨ ਨਾਲ ਕਹੀ ਜਾ ਰਹੀ ਹੈ ਕਿ ਪੰਜਾਬੀ ਮਿਊਜ਼ਿਕ ਇੰਡਸਟਰੀ ਅਤੇ ਗੈਂਗਸਟਰ ਗਰੋਹਾਂ ਦਾ ਬੜਾ ਹੀ ਗਹਿਰਾ ਆਪਸੀ ਸਬੰਧ ਹੈ।

ਇਹ ਗੱਲ ਵੀ ਚਰਚਾ ਵਿੱਚ ਆ ਰਹੀ ਹੈ ਕਿ ਸਿੱਧੂ ਮੂਸੇਵਾਲਾ ਆਪਣੀ ਹਰੇਕ ਐਲਬੈਮ ਵਿੱਚ, ਘੱਟ ਤੋਂ ਘੱਟ, ਇੱਕ ਗੀਤ ਜਰੂਰ ਦਵਿੰਦਰ ਬੰਬੀਹਾ ਗੈਂਗਸਟਰ ਗਰੋਹ ਲਈ ਗਾਉਂਦਾ ਸੀ ਅਤੇ ਲਾਰੈਂਸ ਬਿਸ਼ਨੋਈ ਗੈਂਗਸਟਰ ਗਰੋਹ ਲਈ ਵੀ ਕਈ ਪੰਜਾਬੀ ਗਾਇਕ ਗੀਤ ਗਾਉਂਦੇ ਹਨ।

ਇਹ ਗੱਲ ਵੀ ਉੱਭਰ ਕੇ ਆ ਰਹੀ ਹੈ ਕਿ ਗੈਂਗਸਟਰ ਗਰੋਹ ਪੰਜਾਬੀ ਗਾਇਕਾਂ ਤੋਂ ਫਿਰੌਤੀਆਂ ਵਸੂਲ ਕਰਦੇ ਹਨ ਅਤੇ ਫਿਰੌਤੀਆਂ ਤੋਂ ਇਕੱਠਾ ਕੀਤਾ ਗਿਆ ਕਰੋੜਾਂ ਰੁਪਿਆ ਉਹ ਪੰਜਾਬੀ ਮਿਊਜ਼ਿਕ ਇੰਡਸਟਰੀ ਵਿੱਚ ਆਪਣੀ ਪਰਮੋਸ਼ਨ ਅਤੇ ਗੰਨ ਕਲਚਰ ਦੀ ਪਰਮੋਸ਼ਨ ਲਈ ਖਰਚ ਵੀ ਰਹੇ ਹਨ।

ਮਿਊਜ਼ਿਕ ਇੰਡਸਟਰੀ ਨਾਲ ਜੁੜੇ ਲੋਕ ਇਹ ਗੱਲ ਵੀ ਦੱਸ ਰਹੇ ਹਨ ਕਿ ਅੱਜ ਕੱਲ੍ਹ ਇੱਕ ਚੰਗੀ ਮਿਊਜ਼ੀਕਲ ਵੀਡੀਓ ਬਣਾਉਣ ਉੱਤੇ 10 ਲੱਖ ਰੁਪਏ ਤੋਂ ਲੈ ਕੇ 60 ਲੱਖ ਰੁਪਏ ਤੱਕ ਖਰਚਾ ਹੋ ਜਾਂਦਾ ਹੈ।

ਇਸੀ ਕਾਰਨ ਹੀ ਹੋ ਸਕਦਾ ਹੈ ਕਿ ਅਨੇਕਾਂ ਪੰਜਾਬੀ ਗਾਇਕ ਆਪਣੀ ਮਿਊਜ਼ੀਕਲ ਵੀਡੀਓ ਬਨਾਉਣ ਲਈ ਆ ਰਹੇ ਭਾਰੀ ਖ਼ਰਚਿਆਂ ਵਾਸਤੇ ਆਰਥਿਕ ਮਦਦ ਲੈਣ ਲਈ ਗੈਂਗਸਟਰਾਂ ਨਾਲ ਦੋਸਤਾਨਾ ਸਬੰਧ ਬਣਾਉਣ ਲਈ ਮਜਬੂਰ ਹੋ ਜਾਂਦੇ ਹਨ।

ਜਾਣਕਾਰੀ ਤਾਂ ਹੁਣ ਇੱਥੋਂ ਤੱਕ ਵੀ ਸਾਹਮਣੇ ਆ ਰਹੀ ਹੈ ਕਿ ਕਈ ਗੈਂਗਸਟਰਾਂ ਨੇ ਮਿਊਜ਼ੀਕਲ ਵੀਡੀਓ ਪਰੋਡਕਸ਼ਨ ਸਟੂਡੀਓ ਵੀ ਕਾਇਮ ਕਰ ਲਏ ਹਨ।

ਸ਼ਾਇਦ, ਸਿੱਧੂ ਮੂਸੇਵਾਲਾ ਵੀ ਇਸੇ ਲਾਲਚ ਅਧੀਨ ਹੀ ਗੈਂਗਸਟਰਾਂ ਦੇ ਨੇੜੇ ਚਲਾ ਗਿਆ ਅਤੇ ਉਹਨਾਂ ਦਾ ਮਨਪਸੰਦ ਵਿਸ਼ਾ ਗੰਨ ਕਲਚਰ ਆਪਣੇ ਗੀਤਾਂ ਵਿੱਚ ਪਰਮੋਟ ਕਰਨ ਲੱਗ ਪਿਆ। ਜਿਸ ਕਾਰਨ, ਦੇਖਦੇ ਹੀ ਦੇਖਦੇ, 3/4 ਸਾਲਾਂ ਵਿੱਚ ਹੀ ਸਿੱਧੂ ਮੂਸੇਵਾਲਾ ਇੱਕ ‘ਰੈਪ ਗਾਇਕ’ ਵਜੋਂ ਪ੍ਰਸਿੱਧੀ ਪ੍ਰਾਪਤ ਕਰ ਗਿਆ ਅਤੇ ਉਸਦੇ ਗੀਤਾਂ ਨੂੰ ‘ਗੈਂਗਸਟਰ ਗੀਤ’ ਕਿਹਾ ਜਾਣ ਲੱਗਾ।

ਪਰ ਅੰਤ ਵਿੱਚ ਉਸ ਨੂੰ ਇਸ ਤਰਾਂ ਦੀ ਝੂਠੀ ਸ਼ੁਹਰਤ ਪ੍ਰਾਪਤ ਕਰਨ ਅਤੇ ਦੌਲਤ ਇਕੱਠੀ ਕਰਨ ਦੀ ਵੱਡੀ ਕੀਮਤ ਅਦਾ ਕਰਨੀ ਪਈ। ਉਸ ਨੂੰ ਆਪਣੀ ਜਾਨ ਵੀ ਗਵਾਉਣੀ ਪਈ।
ਅਖੀਰਲੇ ਦਿਨਾਂ ਵਿੱਚ, ਸ਼ਾਇਦ, ਉਸਨੂੰ ਆਪਣੀ ਇਸ ਗ਼ਲਤੀ ਦਾ ਅਹਿਸਾਸ ਵੀ ਹੋਣਾ ਸ਼ੁਰੂ ਹੋ ਗਿਆ ਸੀ ਅਤੇ ਉਸ ਨੇ ਆਪਣੇ ਗੀਤਾਂ ਵਿੱਚ ਲੋਕ ਮਸਲਿਆਂ ਬਾਰੇ ਗੱਲਾਂ ਕਰਨੀਆਂ ਵੀ ਸ਼ੁਰੂ ਕਰ ਦਿੱਤੀਆਂ ਸਨ।

ਪਰ, ਸ਼ਾਇਦ, ਉਦੋਂ ਤੱਕ ਪੁਲਾਂ ਹੇਠੋਂ ਬਹੁਤ ਪਾਣੀ ਲੰਘ ਚੁੱਕਿਆ ਸੀ ਅਤੇ ਜ਼ਿੰਦਗੀ ਦਾ ਰੁਖ ਸਹੀ ਦਿਸ਼ਾ ਵੱਲ ਮੋੜਨਾ ਹੁਣ ਏਨਾ ਅਸਾਨ ਨਹੀਂ ਰਹਿ ਗਿਆ ਸੀ।

ਉਹ ਮੌਤ ਨੂੰ ਮਸ਼ੂਕ ਵਾਂਗ ਉਡੀਕਣ ਲੱਗ ਪਿਆ ਸੀ।

ਪੇਸ਼ ਹਨ ਸਿੱਧੂ ਮੂਸੇਵਾਲਾ ਦੇ ਗੈਂਗਸਟਰ ਗੀਤਾਂ ਵਿੱਚੋਂ ਕੁਝ ਉਦਾਹਰਨਾਂ; ਤਾਂ ਕਿ ਉਸ ਦੀ ਮਾਨਸਿਕਤਾ ਦੇ ਏਸ ਪੱਖ ਨੂੰ ਵੀ ਕੁਝ ਹੋਰ ਚੰਗੀ ਤਰ੍ਹਾਂ ਸਮਝਿਆ ਜਾ ਸਕੇ :

ਗੀਤ :
ਸੋ ਹਾਈ
1।
ਓ ਦੁੱਕੀ ਤਿੱਕੀ ਪੂਰੀ ਠੋਕ ਠੋਕ ਰੱਖਦਾ
ਡੇਂਜਰ ਤੇ ਜਾਨ ਲੇਵਾ ਸ਼ੌਂਕ ਰੱਖਦਾ
ਦੂਰੀ ਫੁੱਟ ਦੀ ਬਣਾ ਕੇ ਹੈ ਮੰਡੀਰ ਖੜ ਦੀ
ਡੱਬ ਵਿੱਚ ਭਰ ਕੇ ਗਲੋਕ ਰੱਖਦਾ
2।
ਓ ਨਾਮ ਕਰੇ ਸ਼ਾਈਨ ਜਿਵੇਂ ਧੁੱਪ ਬੱਲੀਏ
ਮੂੰਹਾਂ ਉੱਤੇ ਰੱਖਦੇ ਹਾਂ ਚੁੱਪ ਬੱਲੀਏ
ਸਕਸੈੱਸ ਰਹਿੰਦੀ ਸ਼ਹਿਰ ਵਿੱਚ ਸ਼ੌਰ ਕਰਦੀ
ਸਾਡਾ ਟੌਪ ਤੇ ਬੰਦੂਕਾਂ ਦਾ ਗਰੁੱਪ ਬੱਲੀਏ
3।
ਜਿਨ੍ਹਾਂ ਜਿਨ੍ਹਾਂ ਨਾਲ ਮੇਰੀ ਯਾਰੀ ਅੱਲੜੇ
ਮਾਰੂ ਹਥਿਆਰ ਦੇ ਸ਼ਿਕਾਰੀ ਅੱਲੜੇ
ਧਰਤੀ ਤੇ ਸੁੱਟਦੇ ਨੇ ਪਾਰ ਦੀਆਂ

ਗੀਤ :
ਗੈਂਗਸਟਰ ਜੱਟ
1।
ਦਾਹੂਦ ਵਾਂਗੂੰ ਅੱਖ ਤੇਰੀ ਗੱਲ ਕਰਦੀ
ਤੂੰ ਕਰਦੀ ਇਸ਼ਾਰਿਆਂ ਐ ਡੀਲ ਸੋਹਣੀਏ
ਦੋ ਮੂੰਹਾਂ ਆਲੇ ਪਿਸਤੌਲ ਰੱਖਦਾ
ਮੇਰੀ ਗੁੰਡਾ ਟੱਚ ਐ ਅਪੀਲ ਸੋਹਣੀਏ
2।
ਗੰਨ ਮੈਕਸੀਕਨ ਬਰੈਂਡ ਬੱਲੀਏ
ਗੱਡ ਦਿੰਦੀ ਬੰਦਾ ਵਿੱਚ ਲੈਂਡ ਬੱਲੀਏ
ਏਹ ਨ ਛੋਟੇ ਵੱਡੇ ਦਾ ਲਿਹਾਜ਼ ਕਰਦੀ
3।
ਗੈਂਗਸਟਰ ਜੱਟ ਨੂੰ ਕਲਮ ਲੱਭ ਗਈ
ਲਿਖ ਲਿਖ ਕਰਤੀ ਤਬਾਹੀ ਨੱਖਰੋ
ਕੱਲਾ ਕੱਲਾ ਬੋਲ ਤੇਰੇ ਹਿੱਟ ਕਰਦਾ
ਖ਼ੂਨ ਵਾਲੀ ਵਰਤਾਂ ਸਿਆਹੀ ਨੱਖਰੋ

ਗੀਤ :
ਮਾਫ਼ੀਆ ਸਟਾਈਲ
1।
ਫੁੱਲ ਮਾਫ਼ੀਆ ਸਟਾਈਲ ਵਿਆਹ ਜੱਟ ਦਾ
ਓ ਲਾਲ ਸੂਹਾ ਰੰਗ ਤਾਂ ਕਿਤੇ ਨੀ ਲੱਭਣਾ
ਓ ਬੰਦੇ ਕਾਲੇ ਹੋਣੇ ਕਾਲੇ ਪਾਏ ਸੂਟ ਹੋਣਗੇ
ਯਾਰਾਂ ਦਾ ਹੀ ਪਿੰਡ ‘ਚ ਖੜਾਕਾ ਸੁਣੂਗਾ
ਦੁੱਕੀ ਤਿੱਕੀ ਸਾਰੀ ਹੀ ਮੀਊਟ ਹੋਣ ਗੇ
ਪੀਐਲਆਰ-16 ਜੈਕਟਾਂ ‘ਚ ਹੋਣਗੀਆਂ
ਪੀਐਲਆਰ-16 ਜੈਕਟਾਂ ‘ਚ ਹੋਣਗੀਆਂ
ਸ਼ੌਂਕ ਫੌਕੀ ਨੀ ਕਰਾਉਣਾ ਠਾਹ ਠਾਹ ਜੱਟ ਦਾ

ਗੀਤ :
ਲਾਸਟ ਰਾਈਡ
1।
ਓ ਚੋਬਰ ਦੇ ਚਿਹਰੇ ਉੱਤੇ ਨੂਰ ਦੱਸਦਾ
ਨੀ ਇਹਦਾ ਉੱਠੂਗਾ ਜਵਾਨੀ ‘ਚ ਜਨਾਜ਼ਾ ਮਿੱਠੀਏ
ਓ ਗਿਣਤੀ ਦੇ ਦਿਨ ਉਹ ਜਿਉਂਦੇ ਜੱਗ ਤੇ
ਅੰਤ ਨੂੰ ਤਰੱਕੀ ਜਿਹਦੀ ਵੈਰੀ ਬਣਦੀ
ਓ ਮਰਦ ਮਸ਼ੂਕਾਂ ਵਾਂਗ ਮੌਤ ਉਡੀਕਦਾ
ਖੌਰੇ ਕਦੋਂ ਖੜਕਾਊ ਦਰਵਾਜ਼ਾ, ਮਿੱਠੀਏ

ਸਿੱਧੂ ਮੂਸੇਵਾਲਾ ਦੇ ਗੈਂਗਸਟਰ ਗੀਤਾਂ ਤੋਂ ਬਿਨ੍ਹਾਂ ਉਸਦਾ ਇੱਕ ਗੀਤ ‘295’ ਵੀ ਕਾਫੀ ਚਰਚਿਤ ਰਿਹਾ ਹੈ। ਇਸ ਗੀਤ ਵਿੱਚ ਸਿੱਧੂ ਮੂਸੇਵਾਲਾ ਬੜੀ ਦਲੇਰੀ ਨਾਲ ਮੌਕਾਪ੍ਰਸਤ ਅਤੇ ਘਟੀਆ ਕਿਰਦਾਰਾਂ ਵਾਲੇ ਰਾਜਨੀਤੀਵਾਨਾਂ, ਸਮਾਜ ਸੇਵੀਆਂ, ਮੀਡੀਆਕਰਮੀਆਂ, ਬੋਲੀ ਦੇ ਰਾਖਿਆਂ, ਭਰਿਸ਼ਟ ਧਾਰਮਿਕ ਨੇਤਾਵਾਂ, ਫੇਸਬੁੱਕੀਆਂ, ਦੀ ਸਖਤ ਸ਼ਬਦਾਂ ਵਿੱਚ ਆਲੋਚਨਾ ਕਰਦਾ ਹੈ। ਉਹ ਇਹ ਵੀ ਕਹਿੰਦਾ ਹੈ ਕਿ ਜੇਕਰ ਸਾਡੇ ਸਾਹਿਤਕਾਰ ਆਪਣੇ ਗੀਤਾਂ ਵਿੱਚ ਸੱਚ ਬੋਲਣਗੇ ਤਾਂ ਸਾਡੀ ਅਗਲੀ ਪੀੜੀ ਵੀ ਵਧੀਆ ਸੋਚ ਵਾਲੀ ਹੋਵੇਗੀ।

ਪੇਸ਼ ਹਨ ਇਸ ਗੀਤ ਦੇ ਤਿੰਨ ਪਹਿਰੇ :
1।
ਨਾਲੇ ਜਿਹੜੇ ਰਸਤੇ ਤੇ ਤੂੰ ਤੁਰਿਆ
ਇੱਥੇ ਬਦਨਾਮੀ ਹਾਈ ਰੇਟ ਮਿਲੂਗੀ
ਨਿੱਤ ਕੰਟਰੋਵਰਸੀ ਕਰੀਏਟ ਮਿਲੂਗੀ
ਧਰਮਾਂ ਦੇ ਨਾਮ ਤੇ ਡਿਬੇਟ ਮਿਲੂਗੀ
ਸੱਚ ਬੋਲੇਂਗਾ ਤਾਂ ਮਿਲੂ 295
ਜੇ ਕਰੇਂਗਾ ਤਰੱਕੀ ਪੁੱਤ ਹੇਟ ਮਿਲੂਗੀ
2।
ਅੱਜ ਕਈ ਬਚਾਉਣ ਸਭਿਆਚਾਰ ਜੁੱਟ ਕੇ
ਜਣਾ ਖਣਾ ਦਿੰਦਾ ਇਹ ਵਿਚਾਰ ਉੱਠ ਕੇ
ਇੰਜ ਲੱਗੇ ਰੱਬ ਜਿਵੇਂ ਹੱਥ ਖੜੇ ਕਰ ਗਿਆ
ਪੜ੍ਹਾਂ ਜਦੋਂ ਸੁਬਹ ਅਖਬਾਰ ਉੱਠ ਕੇ
ਚੁੱਪ ਰਹਿ ਓ ਪੁੱਤਰਾ ਨਹੀਂ ਭੇਦ ਖੋਹਲੀ ਦੇ
ਲੀਡਰ ਨੇ ਏਥੇ ਹੱਕਦਾਰ ਗੋਲੀ ਦੇ
3।
ਜਿਨ੍ਹਾਂ ਦੇ ਜੁਆਕਾਂ ਦੇ ਨਾਮ ਜੌਨ ਤੇ ਸਟੀਵ ਨੇ
ਰਾਖੇ ਬਣੇ ਫਿਰਦੇ ਉਹ ਮਾਂ ਬੋਲੀ ਦੇ
ਉਹ ਝੂਠ ਮੈਨੂੰ ਏਥੋਂ ਦੇ ਫੈਕਟ ਇਹੀ ਨੇ
ਚੋਰ ਬੰਦੇ ਐਥੋਂ ਦੇ ਸਮਾਜ ਸੇਵੀ ਨੇ
ਸੱਚ ਵਾਲਾ ਬਾਣਾ ਪਾ ਜੋ ਲੋਕ ਲੁੱਟਦੇ
ਸਜਾ ਇਹਨਾਂ ਨੂੰ ਵੀ ਛੇਤੀ ਮੇਟ ਮਿਲੂਗੀ

ਸਿੱਧੂ ਮੂਸੇਵਾਲਾ ਦੀ ਗਾਇਕੀ ਬਾਰੇ ਚਰਚਾ ਕਰਨ ਵਾਲਿਆਂ ਦਾ ਮੰਨਣਾ ਹੈ ਕਿ ਉਹ ਪੰਜਾਬੀ ਸਭਿਆਚਾਰ ਦੇ ਅਸਮਾਨ ਵਿੱਚ ਇੱਕ ਤੁਫ਼ਾਨ ਵਾਂਗ ਉੱਠਿਆ ਅਤੇ ਦੇਖਦਿਆਂ ਹੀ ਦੇਖਦਿਆਂ ਕੁਝ ਸਾਲਾਂ ਵਿੱਚ ਹੀ ਸੰਗੀਤ ਦੀ ਦੁਨੀਆ ਵਿੱਚ ਹਰ ਪਾਸੇ ਹੀ ਛਾ ਗਿਆ।
ਉਸ ਦਾ ਨਾਮ ਨ ਸਿਰਫ਼ ਦਿੱਲੀ ਦੇ ਨਾਈਟ ਕਲੱਬਾਂ ਵਿੱਚ ਹੀ ਗੂੰਜਣ ਲੱਗਾ; ਬਲਕਿ, ਵਿਦੇਸ਼ਾਂ ਵਿੱਚ ਵੱਸਦੇ ਪੰਜਾਬੀ ਡਾਇਸਪੋਰਾ ਦੀਆਂ ਸਭਿਆਚਾਰਕ/ਸੰਗੀਤਕ ਪਾਰਟੀਆਂ ਵਿੱਚ ਵੀ ਸਿੱਧੂ ਮੂਸੇਵਾਲਾ ਦਾ ਨਾਮ ਗੂੰਜਣ ਲੱਗਾ।

ਭਾਵੇਂ ਕਿ ਮੁੱਢ ਵਿੱਚ ਉਸ ਦੇ ਗੀਤਾਂ ਵਿੱਚ ਅਜਿਹਾ ਨਹੀਂ ਸੀ; ਪਰ ਹੌਲੀ ਹੋਲੀ ਉਸ ਦੇ ਗੀਤਾਂ ਵਿੱਚ ਗੰਨ ਕਲਚਰ ਅਤੇ ਹਿੰਸਾ ਦਾ ਚਰਚਾ ਆਮ ਹੋਣ ਲੱਗਾ। ਜਿਸ ਕਾਰਨ ਉਸ ਦੇ ਮਿਊਜ਼ੀਕਲ ਪ੍ਰੋਗਰਾਮਾਂ ਵਿੱਚ ਲੜਾਈ ਝਗੜੇ ਹੋਣ ਲੱਗੇ, ਚਾਕੂ ਚੱਲਣ ਲੱਗੇ ਅਤੇ ਮਿਊਜ਼ੀਕਲ ਹਾਲ ਕਮਰਿਆਂ ਵਿੱਚ ਪਈਆਂ ਕੁਰਸੀਆਂ-ਮੇਜ਼ਾਂ ਦੀ ਟੁੱਟ ਭੱਜ ਹੋਣ ਲੱਗੀ। ਜਿਸ ਕਾਰਨ ਪੁਲਿਸ ਨੂੰ ਦਖ਼ਲਅੰਦਾਜ਼ੀ ਕਰਕੇ ਉਸ ਦੇ ਮਿਊਜ਼ੀਕਲ ਸ਼ੋਅ ਵਿੱਚ ਵਿਚਾਲੇ ਬੰਦ ਵੀ ਕਰਨੇ ਵੀ ਪਏ। ਜਿਸ ਕਾਰਨ ਉਸ ਦੇ ਗੀਤਾਂ ਦੀ ਅਖ਼ਬਾਰਾਂ ਵਿੱਚ ਵੀ ਆਲੋਚਨਾ ਹੋਣ ਲੱਗੀ। ਜਿਸ ਕਾਰਨ ਅਖ਼ਬਾਰਾਂ ਵਾਲੇ ਸਿੱਧੂ ਮੂਸੇ ਵਾਲਾ ਨੂੰ ‘ਪੰਜਾਬੀ ਪੰਕ ਗਾਇਕ’ ਵੀ ਕਹਿਣ ਲੱਗੇ।

ਉਸਦੇ ਗੀਤ ਹੁਣ ਔਰਤਾਂ ਉੱਤੇ ਆਪਣਾ ਦਬਦਬਾ ਬਣਾਉਣ ਲਈ ਮਾਰੂ ਹਥਿਆਰਾਂ, ਮਹਿੰਗੀਆਂ ਕਾਰਾਂ ਅਤੇ ਬੇਤਹਾਸ਼ਾ ਹਿੰਸਾ ਕਰ ਸਕਣ ਦੀ ਤਾਕਤ ਦੀਆਂ ਗੱਲਾਂ ਕਰਨ ਲੱਗੇ। ਉਹ ਹੁਣ ਅਜਿਹਾ ਦਾਅਵਾ ਵੀ ਕਰਨ ਲੱਗਾ ਸੀ ਕਿ ਉਸ ਦੇ ਗੀਤ ਸੁਣਨ ਵਾਲੇ ਲੋਕਾਂ ਦੀ ਗਿਣਤੀ ਲੱਖਾਂ ਵਿੱਚ ਸੀ ਅਤੇ ਉਹ ਤਾਂ ਉਹੀ ਕੁਝ ਹੀ ਲਿਖਦਾ ਅਤੇ ਗਾਉਂਦਾ ਸੀ ਜੋ ਕੁਝ ਲੋਕ ਸੁਣਨਾ ਪਸੰਦ ਕਰਦੇ ਸਨ।

ਉਹ ਹੁਣ ਆਪਣੀ ਜ਼ਿੰਦਗੀ ਵੀ ਉਸ ਤਰਾਂ ਹੀ ਜਿਉਂਦਾ ਸੀ ਜਿਸ ਤਰਾਂ ਦੀ ਜ਼ਿੰਦਗੀ ਦੀਆਂ ਗੱਲਾਂ ਉਹ ਆਪਣੇ ਗੀਤਾਂ ਵਿੱਚ ਕਰਦਾ ਸੀ ਜਾਂ ਜਿਸ ਤਰਾਂ ਦੀ ਜ਼ਿੰਦਗੀ ਉਸ ਦੀਆਂ ਮਿਊਜ਼ੀਕਲ ਵੀਡੀਓਜ਼ ਵਿੱਚ ਦਿਖਾਈ ਜਾਂਦੀ ਸੀ।

ਉਹ ਆਪਣੇ ਗੀਤਾਂ ਵਿੱਚ ਕਾਲਪਨਿਕ ਦੁਸ਼ਮਣਾਂ ਨੂੰ ਵੰਗਾਰਦਾ ਸੀ ਅਤੇ ਅਸਲ ਜ਼ਿੰਦਗੀ ਵਿੱਚ ਵੀ ਆਪਣੇ ਸਮਕਾਲੀਆਂ ਨੂੰ ਲੜਾਈਆਂ/ਝਗੜੇ ਕਰਨ ਲਈ ਨਿੱਤ ਚੁਨੌਤੀਆਂ ਦਿੰਦਾ ਸੀ।

ਸਿੱਧੂ ਮੂਸੇਵਾਲਾ ਆਪਣੀ ਰੋਜ਼ਾਨਾ ਜ਼ਿੰਦਗੀ ਵਿੱਚ ਵੀ ਅਤੇ ਆਪਣੀ ਗਾਇਕੀ ਵਿੱਚ ਵੀ ਇੱਕ ਮੁਜਰਮ ਅਤੇ ਇੱਕ ਸਿਪਾਹੀ ਦੇ ਕਿਰਦਾਰ ਵਿੱਚ ਬਹੁਤਾ ਫ਼ਰਕ ਨਹੀਂ ਰੱਖਦਾ ਸੀ।

ਦਰਅਸਲ, ਉਸ ਦੀ ਹੋਂਦ ਦੁਫਾੜ ਮਾਨਸਿਕਤਾ ਵਾਲੇ ਵਿਅਕਤੀ ਵਾਲੀ ਹੋ ਚੁੱਕੀ ਸੀ। ਉਹ ਅਸਲ ਜ਼ਿੰਦਗੀ ਵਿੱਚ ਤਾਂ ਕਹਿੰਦਾ ਸੀ ਕਿ ਉਹ ਰੱਬ ਤੋਂ ਡਰਦਾ ਹੈ ਅਤੇ ਇੱਕ ਨਿਮਾਣਾ ਜਿਹਾ ਬੰਦਾ ਹੈ – ਪਰ ਆਪਣੇ ਗੀਤਾਂ ਵਿੱਚ ਅਤੇ ਆਪਣੀਆਂ ਮਿਊਜ਼ੀਕਲ ਵੀਡੀਓਜ਼ ਵਿੱਚ ਉਹ ਆਪਣੇ ਆਪ ਨੂੰ ਹੀ ਸਰਬ-ਸ਼ਕਤੀਮਾਨ ਰੱਬ ਸਮਝਦਾ ਸੀ।

ਭਾਵੇਂ ਕਿ ਉਹ ਧੀਮੀ ਰਫ਼ਤਾਰ ਨਾਲ ਜ਼ਿੰਦਗੀ ਜਿਉਣ ਵਾਲੇ ਮੂਸਾ ਪਿੰਡ ਵਿੱਚ ਰਹਿੰਦਾ ਸੀ; ਪਰ ਉਹ ਸਮੇਂ ਸਮੇਂ ਗੈਂਗ ਕਲਚਰ ਅਤੇ ਤੇਜ਼ ਰਫ਼ਤਾਰ ਵਾਲੀਆਂ ਸਥਿਤੀਆਂ/ਸਮਾਰੋਹਾਂ ਵਿੱਚ ਵੀ ਹਿੱਸਾ ਲੈਂਦਾ ਰਹਿੰਦਾ ਸੀ ਤਾਂ ਜੋ ਆਪਣੇ ਵਿਅਕਤੀਤਵ ਦੇ ਦੂਜੇ ਪੱਖ ਨੂੰ ਵੀ ਸੰਤੁਸ਼ਟ ਕਰ ਸਕੇ।

ਜਦੋਂ ਸਿੱਧੂ ਮੂਸੇਵਾਲਾ ਨੂੰ ਮੁਲਾਕਾਤਾਂ ਦੌਰਾਨ ਪੁੱਛਿਆ ਜਾਂਦਾ ਕਿ ਉਹ ਆਮ ਜ਼ਿੰਦਗੀ ਵਿੱਚ ਅਤੇ ਮੁਲਾਕਾਤਾਂ ਦੌਰਾਨ ਆਪਣੀਆਂ ਅੱਖਾਂ ਬਹੁਤ ਨੀਵੀਂਆਂ ਰੱਖਦਾ ਹੈ ਪਰ ਵੀਡੀਓਜ਼ ਵਿੱਚ ਉਹ ਬਹੁਤ ਸੌਰ ਸ਼ਰਾਬਾ ਕਰਦਾ ਹੈ? ਤਾਂ ਉਹ ਕਹਿੰਦਾ ਕਿ ਸਟੇਜ ਉੱਤੇ ਤਾਂ ਮੈਨੂੰ ਪ੍ਰੋਫੈਸ਼ਨਲ ਬੰਦੇ ਵਾਂਗੂੰ ਅਦਾਕਾਰੀ ਕਰਨੀ ਪੈਂਦੀ ਹੈ।

ਸਿੱਧੂ ਮੂਸੇਵਾਲਾ ਨੇ ਆਪਣੀ ਇੱਕ ਮੁਲਾਕਾਤ ਦੌਰਾਨ ਇਹ ਗੱਲ ਮੰਨੀ ਸੀ ਕਿ ਉਸ ਨੇ ਆਪਣੇ ਰੈਪ ਗੀਤਾਂ ਵਿੱਚ ਜਦੋਂ ਆਮ ਜ਼ਿੰਦਗੀ ਨਾਲ ਸਬੰਧਿਤ ਗੱਲਾਂ ਕੀਤੀਆਂ ਸਨ ਤਾਂ ਉਨ੍ਹਾਂ ਗੀਤਾਂ ਨੂੰ ਲੋਕਾਂ ਵੱਲੋਂ ਕੋਈ ਬਹੁਤਾ ਚੰਗਾ ਹੁੰਗਾਰਾ ਨਹੀਂ ਮਿਲਿਆ ਸੀ; ਪਰ ਜਦੋਂ ਵੀ ਉਸ ਨੇ ਆਪਣੇ ਗੀਤਾਂ ਵਿੱਚ ਗੰਨ ਕਲਚਰ ਅਤੇ ਹਿੰਸਾ ਦੀ ਗੱਲ ਕੀਤੀ ਸੀ ਤਾਂ ਉਸ ਦੇ ਗੀਤਾਂ ਨੂੰ ਬਹੁਤ ਵੱਡਾ ਹੁੰਗਾਰਾ ਮਿਲਿਆ ਹੈ।

ਸਿੱਧੂ ਮੂਸੇਵਾਲਾ ਉਂਜ ਭਾਵੇਂ ਆਪਣੇ ਆਪ ਨੂੰ ਜ਼ਾਤ-ਪਾਤ ਵਿਰੋਧੀ ਕਹਿੰਦਾ ਹੈ; ਪਰ ਉਹ ‘ਜੱਟਵਾਦ’ ਦਾ ਹੰਕਾਰ ਵੀ ਆਪਣੇ ਗੀਤਾਂ ਵਿੱਚ ਬਾਰ ਬਾਰ ਦਿਖਾਉਂਦਾ ਹੈ।

ਸਿੱਧੂ ਮੂਸੇਵਾਲਾ ਖਿਲਾਫ ਬਹੁਤ ਸਾਰੀਆਂ ਐਫਆਈਆਰ ਵੀ ਦਰਜ ਸਨ।

ਪਰ ਫਿਰ ਵੀ ਪਤਾ ਨਹੀਂ ਕਿਉਂ ਕੁਝ ਲੋਕ ਸਿੱਧੂ ਮੂਸੇਵਾਲਾ ਨੂੰ ਪੰਜਾਬ ਦੇ ਲੋਕ ਨਾਇਕ ਵਜੋਂ ਸਥਾਪਤ ਕਰਨ ਦੀਆਂ ਕੋਸ਼ਿਸ਼ਾਂ ਕਰ ਰਹੇ ਹਨ।

ਭਾਵੇਂ ਕਿ ਉਸਦੇ ਵਧੇਰੇ ਕਰਕੇ ਰੈਪ ਗੀਤਾਂ ਵਿੱਚ ਗੰਨ ਕਲਚਰ ਅਤੇ ਹਿੰਸਾ ਦਾ ਹੀ ਬੋਲਬਾਲਾ ਹੈ; ਪਰ ਉਸ ਨੇ, ਨਿਰਸੰਦੇਹ, ਆਪਣੇ ਕੁਝ ਗੀਤਾਂ ਵਿੱਚ ਆਪਣੇ ਨਿੱਜੀ ਪਰਵਾਰਿਕ ਰਿਸ਼ਤਿਆਂ ਅਤੇ ਕੁਝ ਸਮਾਜਿਕ ਮਸਲਿਆਂ ਬਾਰੇ ਵੀ ਚਰਚਾ ਕੀਤਾ ਹੈ। ਇਨ੍ਹਾਂ ਗੀਤਾਂ ਵਿੱਚ ‘ਡੀਅਰ ਮਾਮਾ’, ‘ਬਾਪੂ’, ‘ਪੰਜਾਬ, ਮਾਈ ਮਦਰ ਲੈਂਡ’ ਅਤੇ ‘ਟਿੱਬਿਆਂ ਦਾ ਪੁੱਤ’ ਦਾ ਵਿਸ਼ੇਸ਼ ਤੌਰ ਉੱਤੇ ਜ਼ਿਕਰ ਕੀਤਾ ਜਾ ਸਕਦਾ ਹੈ।

ਪੇਸ਼ ਹਨ ਸਿੱਧੂ ਮੂਸੇਵਾਲਾ ਦੇ ਇਨ੍ਹਾਂ ਚਾਰ ਗੀਤਾਂ ਵਿੱਚੋਂ ਕੁਝ ਉਦਾਹਰਣਾਂ; ਤਾਂ ਕਿ ਪਾਠਕ ਉਸ ਦੀ ਗਾਇਕੀ ਅਤੇ ਗੀਤਕਾਰੀ ਦੇ ਇਸ ਪੱਖ ਤੋਂ ਵੀ ਵਾਕਫ਼ ਹੋ ਸਕਣ :

ਗੀਤ :
ਬਾਪੂ
1।
ਸਾਰੀ ਉਮਰ ਤੂੰ ਬਾਪੂ ਮੇਰਾ ਕਰਿਆ ਐ
ਹੁਣ ਬੋਝ ਤੂੰ ਮੈਨੂੰ ਦੇ ਦੇ ਤੇਰੇ ਰੌਲ਼ਿਆਂ ਦਾ
ਜਿਹਨੂੰ ਡਿੱਗਦੇ ਢਹਿੰਦੇ ਨੂੰ ਲੋਕੀਂ ਟਿੱਚਰਾਂ ਕਰਦੇ ਸੀ
ਉਹੋ ਪਰਬਤ ਵਾਂਗੂੰ ਛਾਤੀ ਤਾਣ ਖੱਲੋ ਗਿਆ ਐ
ਦੁਨੀਆ ਦੀ ਕਿਹੜੀ ਸ਼ੈਅ ਚਾਹੀਦੀ ਦਸ ਬਾਪੂ
ਪੁੱਤ ਤੇਰਾ ਹੁਣ ਏਨੇ ਜੋਗਾ ਹੋ ਗਿਆ ਐ

2।
ਤੂੰ ਮੇਰਾ ਬਚਪਨ ਉੱਤੇ ਰੱਖਿਆ ਆਪਣੇ ਚਾਵਾਂ ਤੋਂ
ਕੁੱਟ ਕੁੱਟ ਲਿਆਉਂਦਾ ਰਿਹਾ ਤੂੰ ਮਾੜੀਆਂ ਥਾਵਾਂ ਤੋਂ
ਮੈਂ ਵਿੰਗਾ ਬੋਲਾ ਤੇਰੀਆਂ ਝਿੜਕਾਂ ਸਾਂਭ ਲਿਆ ਐ
ਉਂਜ ਪੁੱਤ ਬਿਗੜੇ ਕਿੱਥੇ ਸਾਂਭਦੇ ਕੱਲੀਆਂ ਮਾਵਾਂ ਤੋਂ
ਜੋ ਭਿੱਜੀਆਂ ਅੱਖਾਂ ਤੇਰੀਆਂ ਨੇ ਕਦੇ ਦੇਖੇ ਸੀ
ਮੁਕਾਮ ਐਸੇ ਉਹ ਨਿੱਕੀ ਉਮਰੇ ਛੋਹ ਗਿਆ ਸੀ

ਗੀਤ :
ਡੀਅਰ ਮਾਮਾ
1।
ਕਦੇ ਸੂਰਜ ਵਾਂਗੂੰ ਤਪਦਾ ਹਾਂ
ਕਦੇ ਸ਼ਾਂਤ ਸਵੇਰੇ ਵਰਗਾ ਆਂ
ਮਾਂ ਮੈਨੂੰ ਲੱਗਦਾ ਰਹਿੰਦਾ
ਮੈਂ ਜਮਾ ਤੇਰੇ ਵਰਗਾ ਆਂ
2।
ਕੋਈ ਕਰਦਾ ਦੇਖ ਤਰੱਕੀ
ਮੈਥੋਂ ਸਾੜਾ ਨਹੀਂ ਹੁੰਦਾ
ਮਾਂ ਤੇਰੇ ਵਾਂਗੂੰ ਚਾਹ ਕੇ
ਕਿਸੇ ਦਾ ਮਾੜਾ ਨਹੀਂ ਹੁੰਦਾ

ਗੀਤ :
ਪੰਜਾਬ, ਮਾਈ ਮਦਰਲੈਂਡ
1।
ਕਹਿ ਕਹਿ ਕੇ ਬਦਲੇ ਲੈਂਦਾ
ਮੈਨੂੰ ਪੰਜਾਬ ਕਹਿੰਦੇ ਆ
ਉਹ ਦਿੱਲੀ ਵੀ ਨੱਪ ਲੈਂਦਾ
ਮੈਨੂੰ ਪੰਜਾਬ ਕਹਿੰਦੇ ਆ
ਓ ਬਚ ਕੇ ਰਹਿ ਤੂੰ
ਬਚ ਕੇ ਦਿੱਲੀਏ
ਗਰਮ ਖਿਆਲੀਆਂ ਤੋਂ
ਮੇਰੇ ਬਾਰੇ ਪੁੱਛ ਲੀਂ ਜਾ
ਪੋਰਸ ਅਬਦਾਲੀਆਂ ਤੋਂ
2।
ਪੜ੍ਹ ਤੂੰ ਬੜੇ ਖਿਲਾਫ ਤੂੰ ਦਿੱਤੇ
ਆਰਡਰ ਦਿੱਲੀਏ ਨੀ
ਉਹ ਭੁੱਲੀਂ ਨ ਮੈਨੂੰ ਵੀ ਲੱਗਦੇ
ਬਾਰਡਰ ਦਿੱਲੀਏ ਨੀ
ਓ ਮੂਸੇਵਾਲੇ ਹੁਣ ਨੀ ਗੁੱਡਣੀ
ਤੇਰੀ ਜਾਬ ਕਹਿੰਦੇ ਆ

ਗੀਤ :
ਟਿੱਬਿਆਂ ਦਾ ਗੀਤ
1।
ਥਿੰਕਿੰਗ ‘ਚ ਮੂਸਾ ਬੋਲਦਾ ਐ
ਆਊਟਲੁੱਕ ‘ਚ ਬੋਲੇ ਕੈਨੇਡਾ ਨੀ
ਅਸੀਂ ਮੌਤ ਦੀ ਵੇਟ ‘ਚ ਜਿਉਨੇ ਆਂ
ਸਾਡਾ ਲਿਵਿੰਗ ਸਟਾਈਲ ਐ ਟੇਡਾ ਨੀ
ਵੈਸਟਾਂ ਨਾਲ ਬਾਡੀ ਕੱਜਦੇ ਨੀ
ਸਿੱਧਾ ਹਿੱਕਾਂ ਦੇ ਵਿੱਚ ਵੱਜਦੇ ਨੀ
ਅਸੀਂ ਬੁੱਕਦੇ ਨੀ ਸਿਰ ਗ਼ੈਰਾਂ ਦੇ, ਗ਼ੈਰਾਂ ਦੇ, ਗ਼ੈਰਾਂ ਦੇ
2।
ਮਾੜੇ ਕੰਮ ਕਰਾਂ, ਮਾੜੇ ਗੀਤ ਲਿਖਾਂ
ਨਾਲ ਹੇਰੀਆਂ ਵਾਲੇ ਯਾਰਾਂ ਨੀ
ਤਾਂ ਵੀ ਮੂਸਾ ਵਾਲਾ ਬਣਨੇ ਨੂੰ
ਐ ਭੀੜ ਫਿਰੇ ਕਲਾਕਾਰਾਂ ਦੀ
ਤੇਰੇ ਫੇਵਰਟ ਜਿਹੇ ਕਲਾਕਾਰ ਕੁੜੇ
ਆਹਾ, ਬੌਲੀਵੁੱਡ ਸਟਾਰ ਕੁੜੇ
ਪੈਰ ਧਰਦੇ ਮੇਰੀਆਂ ਪੈੜਾਂ ‘ਤੇ, ਪੈੜਾਂ ‘ਤੇ, ਪੈੜਾਂ ‘ਤੇ
3।
ਓ, ਦੇਖ ਜ਼ਰਾ ਮੂਸੇ ਤੋਂ ਟੋਰਾਂਟੋ ਤੱਕ ਨੀ
ਕਿੰਜ ‘ਮੂਸੇ ਆਲਾ, ਮੂਸੇ ਆਲਾ’ ਹੋਈ ਪਈ ਐ
ਕਈ ਨਾਸਤਿਕ ਮੈਨੂੰ ਦੱਸਦੇ ਨੇ
ਨੀ ਕਈ ਧਰਮਾਂ ਦੇ ਵਿੱਚ ਵਾੜਦੇ ਨੇ
ਨੀ ਕਿਤੇ ਪੂਜਾ ਮੇਰੀ ਕਰਦੇ ਨੇ
ਨੀ ਕਿਤੇ ਪੁਤਲੇ ਮੇਰੇ ਸੜਦੇ ਨੇ
ਨੀ ਕੌਣ ਰੋਕ ਲਊ ਦਰਿਆਵਾਂ ਨੂੰ
ਨੀ ਬੰਨ੍ਹ ਲੱਗਦੇ ਹੁੰਦੇ ਨਹਿਰਾਂ ਦੇ, ਨਹਿਰਾਂ ਦੇ, ਨਹਿਰਾਂ ਦੇ
ਓ, ਮਾੜੀ ਜੱਟ ਦੀ ਹਿੰਡ ਕੁੜੇ
ਮੇਰਾ ਟਿੱਬਿਆਂ ਦੇ ਵਿੱਚ ਪਿੰਡ ਕੁੜੇ

-Sukhinder
Editor : SANVAD
Box 67089, 2300 Yonge St.
Toronto ON M4P 1E0
Canada
Tel. 416-858-7077
poet_sukhinder@hotmail.com

***

815

***

About the author

ਸੁਖਿੰਦਰ
+ ਲਿਖਾਰੀ ਵਿੱਚ ਛਪੀਆਂ ਰਚਨਾਵਾਂ ਦਾ ਵੇਰਵਾ

Sukhinder, Editor: SANVAD, Box 67089, 2300 Yonge St.Toronto ON M4P 1E0 Canada,
Tel. (416) 858-7077, Email: poet_sukhinder@hotmail.com

ਸੁਖਿੰਦਰ

Sukhinder, Editor: SANVAD, Box 67089, 2300 Yonge St.Toronto ON M4P 1E0 Canada, Tel. (416) 858-7077, Email: poet_sukhinder@hotmail.com

View all posts by ਸੁਖਿੰਦਰ →