16 August 2022

ਕਰੂੰਬਲਾਂ: ਤਿੰਨ ਕਵਿਤਾਵਾਂ—ਮਨਦੀਪ ਖਾਨਪੁਰੀ

1. ਚਿੜੀਆਂ ਦੀ ਗੱਲ, 2. ਮਿੱਠੇ  ਸੱਪ  ਅਤੇ 3. ਦਾਦੀ ਨਾਨੀ  
1.ਚਿੜੀਆਂ ਦੀ ਗੱਲ  

ਚੰਨ ਨਾਲ ਤਾਰੇ ਬੋਲਦੇ ਕਿਉਂ ਨੀ, 
ਅੰਮੀਏ ਦੁੱਖ ਸੁੱਖ ਫੋਲਦੇ ਕਿਉਂ ਨੀ। 
ਪਿੰਜਰਿਆਂ ਵਿੱਚ ਬੰਦ  ਵੇਖੇ ਤੋਤੇ,  
ਮੰਗਦੇ ਸੀ ਆਪਣੀ ਰਿਹਾਈ।  
       ਇਕ ਚਿੜੀ ਦੂਜੀ ਨੂੰ  ਕਹਿੰਦੀ ,
      ਭੈਣੇ ਤੂੰ ਬੰਦਿਆ ਹੱਥ ਨਾ ਆਈ।

ਦਾਣੇ ਦਿਖਾ ਕੇ ਹਮਲਾ ਕਰਦੇ,  
ਪੰਛੀਆਂ ਨੂੰ ਏ ਕਮਲਾ ਕਰਦੇ। 
ਮੁੜ ਖੁੱਲ੍ਹੇ ਅੰਬਰੀਂ ਉੱਡਣ ਨਾ ਦਿੰਦੇ, 
ਭਾਵੇਂ ਪਾਵੋ ਲੱਖ ਦੁਹਾਈ। 
     ਇਕ ਚਿੜੀ ਦੂਜੀ ਨੂੰ ਕਹਿੰਦੀ ,
     ਭੈਣੇ ਤੂੰ ਬੰਦਿਆ ਹੱਥ ਨਾ ਆਈਂ।

ਲੋੜ ਤੋਂ ਵੱਧ ਸਿਆਣੀ ਦੁਨੀਆ, 
ਮਰਜ਼ੀ ਨਾਲ ਦਿੰਦੀ ਪਾਣੀ ਦੁਨੀਆਂ।
ਜਾਨਵਰਾਂ ਨੂੰ ਗੁਲਾਮ ਬਣਾਇਆ, 
ਨਾਲੇ ਜਾਂਦੀ ਏ ਖਾਈ।  
     ਇਕ ਚਿੜੀ ਦੂਜੀ ਨੂੰ  ਕਹਿੰਦੀ , 
     ਭੈਣੇ ਤੂੰ ਬੰਦਿਆ ਹੱਥ ਨਾ ਆਈਂ।
**
2. ਮਿੱਠੇ  ਸੱਪ  

ਚੁੱਪ ਹੀ ਰਹਿ ਚੁੱਪ ਚੰਗੀ   ,
ਇਹ ਦੁਨੀਆਂ ਕਰਦੀ ਭੰਡੀ।
ਇੱਥੇ ਝੂਠ ਦੀ ਲੱਗਦੀ ਮੰਡੀ ,
ਬੜੀ ਸੱਚ ਦੀ ਹਾਲਤ ਮੰਦੀ ।
ਭਾਈਆਂ ਤੋਂ ਭਾਈ ਮਰਵਾਉਂਦੀ  ,
ਇਹ ਰਾਜਨੀਤੀ ਬੜੀ ਗੰਦੀ ।
ਸ਼ੈਤਾਨਾਂ ਵਰਗੇ ਲੀਡਰ ਲੱਗਦੇ ,  
     ਚਿੱਟੇ ਕੱਪੜੇ  ਨੇਤਰ ਨਸ਼ੀਲੇ,
     ਅੱਜਕੱਲ੍ਹ ਸੱਪ ਮਿੱਠੇ ਲੋਕ ਜ਼ਹਿਰੀਲੇ।

ਨਸ਼ਿਆਂ ਦੇ ਵਿੱਚ ਧੁੱਤ ਨੇ ,
ਨਿੱਤ ਮਾਂ ਦੀ ਪੁੱਟਦੇ ਗੁੱਤ ਨੇ ।
ਪੱਤੇ ਝਾੜੇ ਚਿੱਟੇ ਦੀ ਰੁੱਤ ਨੇ ,
ਪੰਜਾਬ ਦੇ ਉਜਾੜੇ ਪੁੱਤ ਨੇ ।
        ਸੀ ਜੋ ਗੱਭਰੂ ਛੈਲ ਛਬੀਲੇ,
        ਅੱਜਕੱਲ ਸੱਪ ਮਿੱਠੇ ਲੋਕ ਜ਼ਹਿਰੀਲੇ।

3. ਦਾਦੀ ਨਾਨੀ 

ਮੇਰਾ ਮੁੜ ਮੁੜ ਮੱਥਾ ਚੁੰਮਦੀਆਂ ਨੇ,
ਮੇਰੇ ਅੱਗੇ ਪਿੱਛੇ ਘੁੰਮਦੀਆਂ ਨੇ। 
ਰੱਬ ਦੇ ਘਰ ਵਿੱਚ ਵਸਦੀਆਂ ਨੇ ,
ਚੇਤੇ ਕਰ ਕਰ ਉੱਠਦੀਆਂ ਚੀਸਾਂ। 
    ਖੌਰੇ ਕਿੱਥੋਂ ਕਿੱਥੋਂ ਬਚਾਉਂਦੀਆਂ ਨੇ ,
    ਮਿਲੀਆਂ ਦਾਦੀ ਨਾਨੀ ਦੀਅਾਂ ਅਸੀਸਾਂ ।

ਜੁੱਗ ਜੁੱਗ ਜੀਵੇ ਜਵਾਨੀਆਂ ਮਾਣੇ,  
ਹੁਣ ਮੇਰੀ ਨਾ ਕੋਈ ਪੀੜ ਪਛਾਣੇ। 
ਦਾਦੀ ਦੀ ਬਾਤ ਸੁਣਾ ਦੇ ਮੁੜ ਤੋਂ ,
ਰੱਬਾ ਦੁੱਗਣੀਆਂ ਲੈ ਲਈਂ ਫੀਸਾਂ ।
     ਖੌਰੇ ਕਿੱਥੋਂ ਕਿੱਥੋਂ ਬਚਾਉਂਦੀਆਂ ਨੇ, 
     ਮਿਲੀਆਂ ਦਾਦੀ ਨਾਨੀ ਦੀਅਾਂ ਅਸੀਸਾਂ। 

ਖ਼ੁਸ਼ੀਆਂ ਦੀਆਂ ਭਰ ਬੋਰੀਆਂ ਦਿੱਤੀਆਂ, 
ਮੈਨੂੰ ਗੋਦੀ ਚੁੱਕ ਚੁੱਕ ਲੋਰੀਆਂ ਦਿੱਤੀਆਂ।  
ਹੁਣ ਨਾ ਮੈਨੂੰ ਕੋਈ ਵੀ ਟੋਕਦਾ , 
ਜਦ ਤੁਰਦਾ ਹੋਇਆ ਪੈਰ ਘੜੀਸਾਂ।
     ਖੌਰੇ ਕਿੱਥੋਂ ਕਿੱਥੋਂ ਬਚਾਉਂਦੀਆਂ ਨੇ,  
     ਮਿਲੀਆਂ ਦਾਦੀ ਨਾਨੀ ਦੀਅਾਂ ਅਸੀਸਾਂ।
**
ਮਨਦੀਪ ਖਾਨਪੁਰੀ
ਖਾਨਪੁਰ ਸਹੋਤਾ,  ਹੁਸ਼ਿਆਰਪੁਰ  
ਮੋਬਾਇਲ ਨੰਬਰ -9779179060

***
581
***

About the author

ਮਨਦੀਪ ਖਾਨਪੁਰੀ
+ ਲਿਖਾਰੀ ਵਿੱਚ ਛਪੀਆਂ ਰਚਨਾਵਾਂ ਦਾ ਵੇਰਵਾ

ਮਨਦੀਪ ਖਾਨਪੁਰੀ  mandeep khanpuri
ਗੀਤਕਾਰ, 
ਇਸ ਸਾਲ ਹੀ ਆਪਣੀ ਲਿਖੀ ਕਿਤਾਬ "ਆਫ਼ਤਾਬ " ਮਿੱਤਰ ਸੈਨ ਮੀਤ ਅਤੇ ਕਰਮ ਸਿੰਘ ਜ਼ਖ਼ਮੀ  ਵਰਗੀਆਂ ਉੱਚ ਸ਼ਖਸੀਅਤਾਂ ਹੱਥੋਂ ਲੋਕ ਅਰਪਣ ਕੀਤੀ ਹੈ।
ਪਤਾ - ਖਾਨਪੁਰ ਸਹੋਤਾ  ਹੁਸ਼ਿਆਰਪੁਰ  

ਮੋਬਾਇਲ ਨੰਬਰ  -9779179060

ਮਨਦੀਪ ਖਾਨਪੁਰੀ

ਮਨਦੀਪ ਖਾਨਪੁਰੀ  mandeep khanpuri ਗੀਤਕਾਰ,  ਇਸ ਸਾਲ ਹੀ ਆਪਣੀ ਲਿਖੀ ਕਿਤਾਬ "ਆਫ਼ਤਾਬ " ਮਿੱਤਰ ਸੈਨ ਮੀਤ ਅਤੇ ਕਰਮ ਸਿੰਘ ਜ਼ਖ਼ਮੀ  ਵਰਗੀਆਂ ਉੱਚ ਸ਼ਖਸੀਅਤਾਂ ਹੱਥੋਂ ਲੋਕ ਅਰਪਣ ਕੀਤੀ ਹੈ। ਪਤਾ - ਖਾਨਪੁਰ ਸਹੋਤਾ  ਹੁਸ਼ਿਆਰਪੁਰ   ਮੋਬਾਇਲ ਨੰਬਰ  -9779179060

View all posts by ਮਨਦੀਪ ਖਾਨਪੁਰੀ →