ਪੰਜਾਬ ਦੇ ਮੁੱਖ ਮੰਤਰੀ ਭਗਵੰਤ ਸਿੰਘ ਮਾਨ ਦੇ ਨਾਂਅ ਖੁੱਲਾ ਖ਼ੱਤ–ਮੁੱਖ ਮੰਤਰੀ ਸਿਹਤ ਬੀਮਾ ਯੋਜਨਾ ਅਤੇ ਆਯੁਸ਼ਮਾਨ ਕਾਰਡ ਦਾ ਅਸਲੀ ਸੱਚ-ਕੱਚ ਦਾ ਚਿੱਠਾ 

ਸਤਿ ਸ਼੍ਰੀ ਅਕਾਲ ਜੀ!
ਲਿਖਤੁਮ: ਸੂਬੇਦਾਰ ਜਸਵਿੰਦਰ ਸਿੰਘ ਭੁਲੇਰੀਆ ਪਿੰਡ ਤੇ ਡਾਕ ਮਮਦੋਟ ਜਿਲ੍ਹਾ ਫਿਰੋਜ਼ਪੁਰ 
ਵਿਸ਼ਾ :ਮੁੱਖ ਮੰਤਰੀ ਸਿਹਤ ਬੀਮਾ ਯੋਜਨਾ ਅਤੇ ਆਯੁਸ਼ਮਾਨ ਕਾਰਡ ਦਾ ਅਸਲੀ ਸੱਚ ਕੱਚ ਦਾ ਚਿੱਠਾ  

ਪਿਛਲੇ ਹਫ਼ਤੇ ਮੈ ਆਪਣੇ ਵੱਡੇ ਭਰਾ ਨੂੰ ਇਲਾਜ਼ ਲਈ ਸ਼੍ਰੀ ਗੁਰੂ ਗੋਬਿੰਦ ਸਿੰਘ ਮੈਡੀਕਲ ਹਸਪਤਾਲ ਫਰੀਦਕੋਟ ਲੈ ਕੇ ਗਿਆ। ਪਹਿਲੀ ਗੱਲ ਤਾਂ ਇਹ ਸੀ ਕਿ ਫਰੀਦਕੋਟ ਸਾਡੇ ਪਿੰਡ ਮਮਦੋਟ ਤੋਂ ਲੱਗਭਗ 70 ਕਿਲੋਮੀਟਰ ਦੂਰ  ਹੈ। ਜਦੋ ਅਸੀਂ ਉੱਥੇ ਹਸਪਤਾਲ ਵਿੱਚ ਪਹੁੰਚੇ, ਸਾਡੇ ਮਰੀਜ਼ ਨੂੰ ਉਹਨਾਂ ਨੇ ਐਮਰਜੈਂਸੀ ਵਿੱਚ ਦਾਖਲ ਕਰਨ ਲਈ ਕਿਹਾ। ਅਸੀਂ ਮਰੀਜ਼ ਨੂੰ ਐਮਰਜੈਂਸੀ ਵਿੱਚ ਲੈਕੇ ਗਏ। ਉਹਨਾਂ ਨੇ ਸਾਨੂੰ 1600 ਰੁਪਏ ਜਮਾਂ ਕਰਵਾਉਣ ਵਾਸਤੇ ਕਿਹਾ। ਮੈ ਝੱਟ ਆਪਣੇ ਭਰਾ ਦਾ ਮੁੱਖ ਮੰਤਰੀ ਸਿਹਤ ਬੀਮਾ ਯੋਜਨਾ ਅਤੇ ਆਯੁਸ਼ਮਾਨ ਕਾਰਡ ਉਹਨਾਂ ਨੂੰ ਵਿਖਾ ਦਿੱਤਾ। ਉਹਨਾਂ ਦਾ ਕਹਿਣਾ ਸੀ ਇਹ ਕਾਰਡ ਐਮਰਜੈਂਸੀ ਵਿੱਚ ਨਹੀਂ ਚੱਲਦਾ। ਇਸ ਲਈ ਜਦੋਂ ਤੱਕ  ਤੁਸੀਂ ਪੈਸੇ ਜਮਾਂ ਨਹੀਂ ਕਰਵਾਉਗੇ ਉਸ ਸਮੇਂ ਤਕ  ਇਲਾਜ਼ ਅਰੰਭ ਨਹੀਂ ਹੋਵੇਗਾ। ਅਸੀਂ ਆਪਣੇ ਮਰੀਜ਼ ਦੀ ਹਾਲਤ ਨੂੰ ਦੇਖਦੇ ਹੋਏ ਪੈਸੇ ਜਮਾਂ ਕਰਵਾ ਦਿੱਤੇ। ਦੋ ਜਣੇ ਮਰੀਜ਼ ਦੇ ਕੋਲ ਰੁੱਕ ਗਏ। ਮੈ ਕਾਰਡ ਚਾਲੂ ਕਰਵਾਉਣ ਵਾਸਤੇ ਇੱਕ ਲੰਬੀ ਕਤਾਰ ਵਿੱਚ ਖੜਾ ਹੋ ਗਿਆ। ਮੈਂ ਜਦੋ ਕਤਾਰ ਵਿੱਚ ਖੜਾ ਹੋਇਆ ਸੀ। ਉਸ ਸਮੇ ਘੜੀ ਤੇ ਲੱਗਭਗ ਚਾਰ ਕੁ ਵਜੇ ਸ਼ਾਮ ਸਨ। ਫਿਰ ਬਸ ਗੱਲ ਕੀ ਕਤਾਰ ਵਿੱਚ ਖੜੇ ਖੜੇ ਤੜਕੇ ਦੇ ਢਾਈ ਵੱਜ ਗਏ। ਫਿਰ ਅੰਦਰੋਂ ਇੱਕ ਮੁਲਾਜ਼ਮ ਨਿਕਲਿਆ ਤੇ ਕਹਿੰਦਾ ਹੁਣ ਤੁਸੀਂ ਚਲੇ ਜਾਓ, ਸਵੇਰੇ ਅੱਠ ਵਜੇ ਕੰਮ ਸ਼ੁਰੂ ਹੋਵੇਗਾ। ਕੁੱਝ ਕੁ ਮਰੀਜ਼ਾਂ ਦੇ ਵਾਰਿਸ ਉਥੇ ਹੀ ਲੇਟ ਗਏ ਤੇ ਕੁੱਝ ਕੁ ਇੱਧਰ ਉਧਰ ਚਲੇ ਗਏ। ਸਵੇਰ ਦੇ ਅੱਠ ਵਜੇ ਤਾਂ ਕਤਾਰ ਹੋਰ ਲੰਬੀ ਹੋ ਗਈ। ਫਿਰ ਉਹੀ ਧੱਕ – ਮਧੱਕਾ ਸ਼ੁਰੂ ਹੋ ਗਿਆ। ਖਿੜਕੀਆਂ ਪੰਜ ਹਨ ਪਰ ਕਾਰਡ ਚਾਲੂ ਕਰਨ ਦਾ ਕੰਮ ਇੱਕ ਹੀ ਖਿੜਕੀ ਤੇ ਕੀਤਾ ਜਾ ਰਿਹਾ ਹੈ। ਮੁੱਕਦੀ ਗੱਲ ਇਹ ਹੈ ਕਿ ਅਗਲੇ ਦਿਨ ਸ਼ਾਮ ਨੂੰ ਚਾਰ ਪੰਜ ਵਜੇ ਕਾਰਡ ਚਾਲੂ ਕੀਤਾ ਗਿਆ। ਉਦੋਂ ਤੱਕ ਮਰੀਜ਼ ਦੇ ਸਾਰੇ ਹੀ ਟੈਸਟ ਤੇ ਦਵਾਈਆਂ ਮੁੱਲ ਖਰੀਦਣੀਆਂ ਪਈਆਂ।

ਅਗਲੀ ਗੱਲ ਜਦੋਂ ਡਾਕਟਰ ਦਵਾਈ ਲਿਖ ਦਿੰਦੇ ਹਨ ਤਾਂ ਉਹ ਦਵਾਈ ਲੈਣ ਦਾ ‘ਪਰਸੀਜ਼ਰ’ ਬਹੁਤ ਹੀ ਲੰਬਾ ਹੈ। ਪਹਿਲਾਂ ਪਰਚੀਆਂ ਉਤੇ ਕਲਰਕ ਤੋਂ ਮੋਹਰ ਲਵਾ ਕੇ ਫਿਰ ਸਬੰਧਤ ਡਾਕਟਰ ਦੇ ਹਸਤਾਖਸਰ ਕਰਾਉਣੇ ਪੈਂਦੇ ਹਨ। ਫਿਰ ਕਤਾਰ ਵਿੱਚ ਲੱਗ ਕੇ ਇੱਕ ਖਿੜਕੀ ਤੇ ਪਰਚੀ ਜਮਾਂ ਕਰਨੀ ਪੈਂਦੀ ਹੈ। ਉਹ ਪਰਚੀ ਚੈਕ ਕਰਕੇ ਇੱਕ ਮੋਹਰ ਲਾ ਕੇ ਦਿੰਦੇ ਹਨ ਫਿਰ ਪਰਚੀ ਨੂੰ ਡਿਸਪੈਂਸਰੀ ਵਿੱਚ ਲੈ ਕੇ ਜਾਣਾ ਪੈਂਦਾ ਹੈ। ਉਥੇ ਵੀ ਲੰਬੀ ਕਤਾਰ ਵਿੱਚ ਖੜਨਾ ਪੈਂਦਾ ਹੈ ਅਤੇ ਦੋ ਨੰਬਰ ਆਉਂਦਾ ਹੈ ਤਾਂ ਫਿਰ ਮੁਲਾਜ਼ਮ ਉਸ ਪਰਚੀ ਤੇ ਦਵਾਈਆਂ ਦਾ ਐਸਟੀਮੇਟ ਲਾ ਕੇ ਦਿੰਦੇ ਹਨ। ਇਸ ਪਿੱਛੋਂ ਐਸਟੀਮੇਟ ਵਾਲੀ ਪਰਚੀ ਇੱਕ ਅਲੱਗ ਖਿੜਕੀ ਵਿੱਚ ਜਮਾਂ ਕਰਵਾਉਣੀ ਪੈਂਦੀ ਹੈ। ਉਥੇ ਵੀ ਲੰਬੀ ਕਤਾਰ ਲੱਗੀ ਹੁੰਦੀ ਹੈ। ਫਿਰ ਮੁਲਾਜ਼ਮ ਐਸਟੀਮੇਟ ਵਾਲੀ ਪਰਚੀ ਤੇ ਬਿੱਲ ਕੱਟ ਕੇ ਦਿੰਦਾ ਹੈ । ਉਹ ਬਿੱਲ ਲੈ ਕੇ ਡਿਸਪੈਂਸਰੀ ਉਤੇ ਜਾਣਾ ਪੈਂਦਾ ਹੈ। ਫਿਰ ਲੰਬੀ ਕਤਾਰ ਵਿੱਚ ਖੜ ਕੇ ਪਰਚੀ ਜਮਾਂ ਕਰਾਉਣੀ ਪੈਂਦੀ ਹੈ। ਫਿਰ ਉਹ ਅਗੋਂ ਆਖਦੇ ਹਨ ਕਿ ਦੋ ਘੰਟਿਆਂ ਬਾਹਦ ਆਉਣਾ। ਅਗੋਂ ਤੁਸੀਂ ਆਪ ਹੀ ਹਿਸਾਬ ਲਗਾ ਲਵੋਂ ਕਿ ਉਹ ਦਵਾਈ ਆਉਣ ਤੱਕ ‘ਸੀਰੀਅਸ’ ਮਰੀਜ਼ ਦਾ ਕੀ ਬਣੇਗਾ? ਇਸ ਖੱਜਲ ਖੁਆਰੀ ਨੂੰ ਵੇਖਦੇ ਹੋਏ ਲੋਕ ਬਾਹਰੋਂ ਪ੍ਰਾਈਵੇਟ ਦੁਕਾਨਾਂ ਤੋਂ ਦਵਾਈ ਲੈਣ ਲਈ ਮਜ਼ਬੂਰ ਹੋ ਜਾਂਦੇ ਹਨ।

ਇਸ ਤੋਂ ਬਾਹਦ ਜਦੋਂ ਕਾਰਡ ਬੰਦ ਕਰਵਾਉਣਾ ਪੈਂਦਾ ਹੈ ਤਾਂ ਫਿਰ ਵੀ 25 ਤੋਂ 30 ਘੰਟੇ ਲੱਗ ਜਾਂਦੇ ਹਨ ਕਿਉਂਕਿ ਕਾਰਡ ਵੀ ਉਸੇ ਹੀ ਖਿੜਕੀ ਵਿੱਚੋ ਬੰਦ ਹੁੰਦਾ ਹੈ ਜਿਥੋਂ ਕਾਰਡ ਚਾਲੂ ਕਰਵਾਇਆ ਜਾਂਦਾ। ਸਭ ਤੋਂ ਵੱਡੀ ਮੁਸੀਬਤ ਇਹ ਹੈ ਕਿ ਕਾਰਡ ਸਿਰਫ ਤਿੰਨ ਦਿਨਾਂ ਤਕ ਹੀ ਚਲਦਾ ਹੈ। ਉਸ ਵਿੱਚ ਪੈਸੇ ਵੀ ਸੱਤ ਅੱਠ ਹਜ਼ਾਰ ਹੀ ਹੁੰਦੇ ਹਨ। ਕਹਿਣ ਨੂੰ ਪੰਜ ਲੱਖ ਪਰ ਵਿੱਚੋ ਮਿਲਦਾ ਨਹੀਂ ਕੱਖ ਵੀ। ਮੁੱਖ ਮੰਤਰੀ ਸਾਬ ਜੀ! ਇਹ ਲੋਕਾਂ ਦੀ ਸਿਹਤ ਨਾਲ ਸਿੱਧਾ ਸਿੱਧਾ ਖਿਲਵਾੜ ਹੋ ਰਿਹਾ ਹੈ। ਬੇਸ਼ਕ ਸਾਡੇ ਮਾਣਯੋਗ ਸਿਹਤ ਮੰਤਰੀ ਬਲਬੀਰ ਸਿੰਘ ਜੀ ਨੂੰ ਕਹੋ ਕਿ ਉਹ ਆਪਣੇ ਕਿਸੇ ਵਫ਼ਾਦਾਰ ਮੁਲਾਜ਼ਮ ਨੂੰ ਫਰੀਦਕੋਟ ਭੇਜ ਕੇ ਚੈਕ ਕਰਵਾ ਸਕਦੇ ਹਨ। ਅਗਰ ਸਹੂਲਤਾਂ ਦੇਣੀਆਂ ਹਨ ਤੇ ਫਿਰ ਖਿੜਕੀਆਂ ਜ਼ਿਆਦਾ ਚਾਲੂ ਕਰਨੀਆਂ ਪੈਣਗੀਆਂ। ਇਹ ਬਿਲਕੁਲ ਸਚਾਈ ਹੈ। ਲੋਕਾਂ ਨੂੰ ਬਿਆਨਾਂ ਰਾਹੀਂ ਗੁਮਰਾਹ ਨਾ ਕੀਤਾ ਜਾਵੇ। ਅਗਰ ਤੁਸੀਂ ਇੱਕ ਸਚੇ ਸੁੱਚੇ ਆਮ ਆਦਮੀ ਹੋ ਫਿਰ ਆਮ ਆਦਮੀ ਦੀ ਸਿਹਤ ਦਾ ਇਲਾਜ਼ ਵੀ ਹੋਣ ਦਿਉ। ਉਮੀਦ ਹੈ ਕਿ ਆਪ ਮੇਰੀ ਇਸ ਚਿੱਠੀ ਤੇ ਜ਼ਰੂਰ ਗਹੁ ਕਰੋਂਗੇ।

ਬੇਨਤੀ ਕਰਤਾ ਸਮੁੱਚੇ ਪੰਜਾਬ ਦਾ ਇੱਕ ਵਸਨੀਕ :

ਸੂਬੇਦਾਰ ਜਸਵਿੰਦਰ ਸਿੰਘ ਭੁਲੇਰੀਆ
ਪਿੰਡ ਤੇ ਡਾਕ ਮਮਦੋਟ
ਜਿਲ੍ਹਾ ਫਿਰੋਜ਼ਪੁਰ
7589155501

*’ਲਿਖਾਰੀ’ ਵਿਚ ਪ੍ਰਕਾਸ਼ਿਤ ਹੋਣ ਵਾਲੀਆਂ ਸਾਰੀਆਂ ਹੀ ਰਚਨਾਵਾਂ ਵਿਚ ਪ੍ਰਗਟਾਏ ਵਿਚਾਰਾਂ ਨਾਲ ‘ਲਿਖਾਰੀ’ ਦਾ ਸਹਿਮਤ ਹੋਣਾ ਜ਼ਰੂਰੀ ਨਹੀਂ। ਹਰ ਲਿਖਤ ਵਿਚ ਪ੍ਰਗਟਾਏ ਵਿਚਾਰਾਂ ਦਾ ਜ਼ਿੰਮੇਵਾਰ ਕੇਵਲ ‘ਰਚਨਾ’ ਦਾ ਕਰਤਾ ਹੋਵੇਗਾ।
****
1310
***