ਜਾਗ ਪਏ ਨੇ ਵਖਤਾਂ ਵਾਲੇ—ਰੂਪ ਲਾਲ ਰੂਪ

ਹੁਣ ਨਾ ਜੰਮਣੇ ਖੂਹ ਦੇ ਡੱਡੂ ।
ਨਾ ਦੋਨੋਂ ਹੱਥ ਹੋਣਗੇ ਲੱਡੂ ।
ਮਨ ਮਰਜ਼ੀ ਦੇ ਹਾਕਮ ਤਾਈਂ,
ਹੁਣ ਪਬਲਿਕ ਪਟਕਾ ਕੇ ਛੱਡੂ ।
ਭਿੰਨ-ਭੇਦ ਨਾ ਚੱਲਣਾ ਕੋਈ,
ਗੋਰੇ ਕਾਲੇ ਦਾ ।
ਆਰ ਪਾਰ ਦਾ ਯੁੱਧ ਹੋਊ,
ਨਾ ਵਿਚ ਵਿਚਾਲੇ ਦਾ ।

ਲੰਮੇ ਲੰਮੇ ਵਾਅਦੇ ਕਰ ਕੇ ।
ਹਾਕਮ ਭੁੱਲਦੇ ਇਕ ਇਕ ਕਰ ਕੇ ।
ਟੈਕਸਾਂ ਵਾਲੇ ਬੋਝ ਦੇ ਤਾਈਂ,
ਲੋਕਾਂ ਨੇ ਨਾ ਬਹਿਣਾ ਜਰ ਕੇ ।
ਮਧੁਪ ਮਖੀਰਾ ਮੋੜ ਦੇਊਗਾ,
ਮੂੰਹ ਪਰਨਾਲੇ ਦਾ ।
ਆਰ ਪਾਰ ਦਾ ਯੁੱਧ ਹੋਊ,
ਨਾ ਵਿਚ ਵਿਚਾਲੇ ਦਾ ।

ਦੋਮ ਸੇਮ ਦੀ ਦਰਜਾਬੰਦੀ ।
ਨਾ ਚੱਲਣੀ ਹੁਣ ਨੀਅਤ ਮੰਦੀ ।
ਮਨ ਦੇ ਕਪਟੀ ਹਾਕਮ ਤਾਈਂ,
ਰਤਾ ਵੀ ਮਿਲਣੀ ਨਾ ਬਖਸ਼ੰਦੀ।
ਕੱਢ ਦਿੱਤਾ ਏ ਚੰਡ ਗੁਰਾਂ,
ਰੰਬੀ ਦੇ ਫਾਲ੍ਹੇ ਦਾ ।
ਆਰ ਪਾਰ ਦਾ ਯੁੱਧ ਹੋਊ,
ਨਾ ਵਿਚ ਵਿਚਾਲੇ ਦਾ ।

ਸਭਨਾ ਤਾਈਂ ਅੰਨ ਚਾਹੀਦਾ ।
ਹਰ ਸ਼ਹਿਰੀ ਪ੍ਰਸੰਨ ਚਾਹੀਦਾ ।
ਵਿੱਦਿਆ ਦੀਪ ਜਗਾਵੇ ਸਭ ਦਾ,
ਵਿੱਦਿਆ ਨਹੀਂ ਡੰਨ ਚਾਹੀਦਾ ।
‘ਰੂਪ ‘ ਬੀਤ ਗਿਆ ਵੇਲਾ ਮਾੜਾ,
ਘਾਲ੍ਹੇ ਮਾਲ੍ਹੇ ਦਾ ।
ਆਰ ਪਾਰ ਦਾ ਯੁੱਧ ਹੋਊ,
ਨਾ ਵਿਚ ਵਿਚਾਲੇ ਦਾ ।
***
ਰੂਪ ਲਾਲ ਰੂਪ
ਪਿੰਡ ਭੇਲਾਂ ਡਾਕਖਾਨਾ ਨਾਜਕਾ
ਜਿਲ੍ਹਾ ਜਲੰਧਰ (ਜਲੰਧਰ)
94652-25722