ਕੁਝ ਰਚਨਾਵਾਂ – ਰੂਪ ਲਾਲ ਰੂਪ

ਜ਼ਮੀਰਾਂ ਦੀ ਸ਼ਾਮ
————-
ਕਾਲੇ ਧਨ ਦਾ ਕਾਲਾ ਮੀਂਹ ਵਰ੍ਹਦਾ ,
ਕਦਰਾਂ ਕੀਮਤਾਂ ਕੀਤੀਆਂ ਜਾਮ ਮੀਆਂ।
ਨਾਚ ਨੱਚਦੇ ਨੇਤਾ ਪੁਤਲੀਆਂ ਦਾ,
ਕਾਰਪੋਰੇਟਾਂ ਦੇ ਸਭ ਗ਼ੁਲਾਮ ਮੀਆਂ ।
ਕਬਜ਼ਾ ਦੇਸ਼ ‘ਤੇ ਚੰਦ ਘਰਾਣਿਆਂ ਦਾ,
ਲੋਕਤੰਤਰ ਦਾ ਨਾਂ ਬਦਨਾਮ ਮੀਆਂ ।
‘ਰੂਪ’ ਸ਼ਾਇਰਾ ਕੋਠੇ ਚੜ੍ਹ ਮਾਰ ਨਾਅਰਾ,
ਮਹਿੰਗੀ ਪਊ ਜ਼ਮੀਰਾਂ ਦੀ ਸ਼ਾਮ ਮੀਆਂ ।

ਸੁਆਣੀਆਂ
——–
ਕੰਮ ਮੁੱਕਦਾ ਨਹੀਂ ਸੁਆਣੀਆਂ ਦਾ,
ਚੁੱਲ੍ਹੇ-ਚੌਂਕੇ ਤੇ ਲੀੜੇ ਲੱਤਿਆਂ ਦਾ।
ਝਾੜੂ ਪੋਚਾ ਲਗਾ ਨੌਣ ਧੋਣ ਕਰਨਾ,
ਰੋਹਬ ਝੱਲਣਾ ਢੋਲ ਕੁਪੱਤਿਆਂ ਦਾ।
ਆਏ ਗਏ ਦੀ ਕਰਨੀ ਪ੍ਰਾਹੁਣਚਾਰੀ,
ਲੇਖਾ ਰੱਖਣਾ ਠੰਢਿਆਂ ਤੱਤਿਆਂ ਦਾ।
‘ਰੂਪ’ ਸ਼ਾਇਰਾ ਪਵੇ ਨਾ ਮੁੱਲ ਕੌਡੀ ,
ਸੁਆਣੀਆਂ ਬਾਝ ਮਹੱਲਾਂ ਛੱਤਿਆਂ ਦਾ।

ਸਿਆਸੀ ਦਲ
———-
ਲੀਹੋਂ ਲੱਥੇ ਸਿਆਸੀ ਦਲ ਸਾਰੇ,
ਅੱਡੇ ਬਣ ਗਏ ਸਭ ਗਦਾਰੀਆਂ ਦੇ।
ਦਲ ਬਦਲਦੇ ਸਾਲ ਵਿਚ ਤਿੰਨ ਵਾਰੀ,
ਨੇਤਾ ਗੋਦੀ ਬੈਠ ਵਪਾਰੀਆਂ ਦੇ ।
ਮਾਸਾ ਮੁੱਲ ਨਾ ਜਾਣਨ ਵੋਟਰਾਂ ਦਾ,
ਵੱਗ ਸਮਝਦੇ ਨੇ ਵਗਾਰੀਆਂ ਦੇ।
‘ਰੂਪ’ ਸ਼ਾਇਰਾ ਪਰ੍ਹਾਂ ਸੁੱਟ ਪਰਖਿਆਂ ਨੂੰ ।
ਦੰਦੇ ਭੋਰ ਕੇ ਸਭ ਗਰਾਰੀਆਂ ਦੇ।
***
ਰੂਪ ਲਾਲ ਰੂਪ
ਪਿੰਡ ਭੇਲਾਂ ਡਾਕਖਾਨਾ ਨਾਜਕਾ
ਜਿਲ੍ਹਾ ਜਲੰਧਰ (ਪੰਜਾਬ)
+91 94652-25722

****

ਲਿਖਾਰੀ’ ਵਿਚ ਪ੍ਰਕਾਸ਼ਿਤ ਹੋਣ ਵਾਲੀਆਂ ਸਾਰੀਆਂ ਹੀ ਰਚਨਾਵਾਂ ਵਿਚ ਪ੍ਰਗਟਾਏ ਵਿਚਾਰਾਂ ਨਾਲ ‘ਲਿਖਾਰੀ’ ਦਾ ਸਹਿਮਤ ਹੋਣਾ ਜ਼ਰੂਰੀ ਨਹੀਂ। ਹਰ ਲਿਖਤ ਵਿਚ ਪ੍ਰਗਟਾਏ ਵਿਚਾਰਾਂ ਦਾ ਜ਼ਿੰਮੇਵਾਰ ਕੇਵਲ ‘ਰਚਨਾ’ ਦਾ ਕਰਤਾ ਹੋਵੇਗਾ।
****
1324
***