ਵਿਸਾਖੀ ਤੇ ਵਿਸ਼ੇਸ਼: ਆ ਨੀ ਵਿਸਾਖੀਏ (ਗੀਤ)/ਖ਼ਾਲਸੇ ਦੀ ਮਹਿਮਾ/ਖ਼ਾਲਸੇ ਦਾ ਰੁਤਬਾ ਬੜਾ ਮਹਾਨ ਹੈ (ਗੀਤ)— ਗੁਰਦੀਸ਼ ਕੌਰ ਗਰੇਵਾਲ, ਕੈਲਗਰੀ, ਕੈਨੇਡਾ

ਪੰਜੇ ਨੇ ਪਿਆਰੇ ਵਿੱਚੋਂ, ਵੱਖ ਵੱਖ ਜਾਤਾਂ ਦੇ।
ਗੋਬਿੰਦ ਚਲਾਏ ਦੇਖੋ, ਰਾਜ ਪੰਚਾਇਤਾਂ ਦੇ।
ਜਾਤ ਪਾਤ ਭੇਦ ਨੂੰ, ਮਿਟਾ ਨੀ ਵਿਸਾਖੀਏ।
ਆ…….

ਆਪੇ ਗੁਰੂ ਆਪੇ ਹੀ ਉਹ, ਬਣ ਬੈਠਾ ਚੇਲਾ ਏ।
ਗੁਰੂ ਅਤੇ ਚੇਲੇ ਵਿੱਚ, ਰਿਹਾ ਨਾ ਝਮੇਲਾ ਏ।
ਏਹੋ ਜਿਹਾ ਸਭ ਨੂੰ, ਬਣਾ ਨੀ ਵਿਸਾਖੀਏ।
ਆ…….

ਸੀਸ ਭੇਟ ਕਰ ਜਿਹਨਾਂ, ਆਪਾ ਏ ਮਿਟਾ ਲਿਆ।
ਸਿੰਘ ਸਜ ਇੱਕ ਇੱਕ, ਲੱਖਾਂ ਨੂੰ ਮੁਕਾ ਲਿਆ।
ਮੁੜ ਓਹੀ ਸ਼ਕਤੀ, ਜਗਾ ਨੀ ਵਿਸਾਖੀਏ।
ਆ……..

ਗੋਬਿੰਦ ਗੁਲਾਮੀ ਵਾਲਾ, ਜੂਲਾ ਗਲੋਂ ਲਾਹ ਗਿਆ।
ਸੁੱਤੀ ਹੋਈ ਕੌਮ ਨੂੰ, ਝੰਜੋੜ ਕੇ ਜਗਾ ਗਿਆ।
ਐਸਾ ਮੁੜ ਬਿਗਲ, ਵਜਾ ਨੀ ਵਿਸਾਖੀਏ।
ਆ………

ਸਿੰਘ ਸਜ ਗੁਰੂ ਦੀਆਂ, ਖੁਸ਼ੀਆਂ ਨੂੰ ਮਾਣੀਏਂ।
ਬਾਣੀ ਅਤੇ ਬਾਣੇ ਦੀ, ਕਦਰ ‘ਦੀਸ਼’ ਜਾਣੀਏਂ।
ਖੰਡੇ ਵਾਲੀ ਪਾਹੁਲ, ਵਰਤਾ ਨੀ ਵਿਸਾਖੀਏ।
ਆ……
***

ਖ਼ਾਲਸਾ ਸਾਜਨਾ ਦਿਵਸ ਤੇ ਵਿਸ਼ੇਸ਼—ਖ਼ਾਲਸੇ ਦੀ ਮਹਿਮਾ

ਖ਼ਾਲਸਾ ਕੌਮ ਹੈ ਖ਼ਾਲਸ ਬਹਾਦਰਾਂ ਦੀ,
ਇਹਦਾ ਜਨਮ ਹੋਇਆ ਖੰਡੇ ਧਾਰ ਵਿੱਚੋਂ।
ਇਹਦਾ ਪਿਤਾ ਗੋਬਿੰਦ ਸਿੰਘ ਆਪ ਹੈ ਜੀ
ਇਹਦਾ ਵੱਖਰਾ ਰੂਪ ਸੰਸਾਰ ਵਿੱਚੋਂ।

ਇਹਨੂੰ ਸੋਭਦੇ ਪੰਜ ਕਕਾਰ ਭਾਵੇਂ,
ਪਰ ਡੁੱਲਦੀ ਸ਼ਾਨ ਦਸਤਾਰ ਵਿੱਚੋਂ।
ਇਹਦੀ ਸੂਰਤ ਤੇ ਸੀਰਤ ਹੈ ਬੜੀ ਸੋਹਣੀ
ਦਿਸ ਪੈਂਦਾ ਏ ਬੇਸ਼ੁਮਾਰ ਵਿੱਚੋਂ।

ਜਦੋਂ ਸਾਜਿਆ ਸ੍ਰੀ ਦਸ਼ਮੇਸ਼ ਇਹਨੂੰ,
ਕੇਸਗੜ੍ਹ ਅੰਦਰ ਚਮਤਕਾਰ ਹੋਇਆ।
ਸੁਰ ਨਰ ਮੁਨ ਜਨ ਅੰਮ੍ਰਿਤ ਖੋਜਦੇ ਜੋ,
ਅੰਮ੍ਰਿਤ ਆਬੇ ਹਯਾਤ ਤਿਆਰ ਹੋਇਆ।

ਅੰਮ੍ਰਿਤ ਛੱਕ ਕੇ ਖ਼ਾਲਸਾ ਪੰਥ ਉਦੋਂ,
ਬਲੀ, ਸੂਰਮਾ, ਯੋਧਾ, ਬਲਕਾਰ ਹੋਇਆ।
ਦਾਤਾ ਅੰਮ੍ਰਿਤ ਦਾ ਬਣ ਕੇ ਆਪ ਚੇਲਾ,
ਖੁਦ ਅੰਮ੍ਰਿਤ ਦਾ ਤਲਬਗਾਰ ਹੋਇਆ।

ਇਹਦੇ ਵਿੱਚ ਹੈ ਜਜ਼ਬਾ ਸ਼ਹਾਦਤਾਂ ਦਾ,
ਗੁੜ੍ਹਤੀ ਮਿਲੀ ਹੈ ਇਹਨੂੰ ਕੁਰਬਾਨੀਆਂ ਦੀ।
ਸਿਰਾਂ ਬਦਲੇ ਸਰਦਾਰੀਆਂ ਏਸ ਲਈਆਂ,
ਈਨ ਮੰਨਦਾ ਨਹੀ ਇਹ ਅਭਿਮਾਨੀਆਂ ਦੀ।

ਇਹ ਤਾਂ ਖੜ੍ਹਦਾ ਹੈ ਨਾਲ ਨਿਮਾਣਿਆਂ ਦੇ,
ਐਪਰ ਜ਼ੁਲਮ ਦੇ ਅੱਗੇ ਵੀ ਝੁੱਕਦਾ ਨਾ।
ਕਿਰਤ ਕਰਨੀ ਤੇ ਵੰਡ ਕੇ ਹੈ ਛਕਣਾ,
ਸੇਵਾ ਕਰਨ ਤੋਂ ਕਿਤੇ ਵੀ ਰੁੱਕਦਾ ਨਾ।

ਇਹ ਤਾਂ ਰੈਡ ਕਰਾਸ ਦੀ ਨੀਂਹ ਰੱਖੇ,
ਪਾਣੀ ਦੁਸ਼ਮਣਾਂ ਤਾਂਈ ਪਿਲਾਈ ਜਾਵੇ।
ਇਹ ਤਾਂ ਪਿਤਾ ਦਸ਼ਮੇਸ਼ ਦਾ ਹੁਕਮ ਮੰਨ ਕੇ,
ਮੱਲ੍ਹਮ ਫੱਟਾਂ ਦੇ ਉੱਤੇ ਵੀ ਲਾਈ ਜਾਵੇ।

ਸਦਾ ਕੌਮ ਲਈ ਜਿੰਦ ਤੇ ਜਾਨ ਵਾਰੇ,
ਨਿੱਤਰ ਪੈਂਦਾ ਏ ਪਹਿਲੀ ਕਤਾਰ ਵਿੱਚੋਂ,
ਇਹ ਤਾਂ ਭਲਾ ਸਰਬੱਤ ਦਾ ਰਹੇ ਮੰਗਦਾ,
ਨੂਰ ਝਲਕਦਾ ਇਹਦੇ ਕਿਰਦਾਰ ਵਿੱਚੋਂ।

ਬੰਦ ਬੰਦ ਕਟਵਾਇਆ ਸੀ ਖ਼ਾਲਸੇ ਨੇ
ਸਿੱਖੀ ਸਿਦਕ ਤੋਂ ਕਦੇ ਵੀ ਡੋਲਿਆ ਨਾ।
ਜਦੋਂ ਜਦੋਂ ਵੀ ਪੰਥ ਨੇ ਸੀਸ ਮੰਗੇ
ਕੋਈ ਰਾਹ ਬਚਾ ਦਾ ਟੋਲਿਆ ਨਾ।

ਜਦੋਂ ਕਦੇ ਵੀ ਕੌਮ ਤੇ ਬਣੇ ਬਿਪਤਾ
ਚੁੱਪ ਕਰ ਨਹੀਂ ਖ਼ਾਲਸਾ ਬਹਿ ਸਕਦਾ।
ਜ਼ੁਲਮ ਤਨ ਦੇ ਉੱਤੇ ਸਹਾਰ ਲੈਂਦਾ
ਹੇਠੀ ਜ਼ਾਲਿਮ ਦੀ ਕਦੇ ਨਹੀਂ ਸਹਿ ਸਕਦਾ।

ਇਹ ਤਾਂ ਮੌਤ ਨੂੰ ਕਰੀ ਮਖੌਲ ਜਾਵੇ
ਸੀਸ ਦੇ ਕੇ ਜਿੰਦਗੀ ਮਾਣਦਾ ਏ।
ਅਕਾਲ ਪੁਰਖ ਦੀ ਫੌਜ ਹੈ ਇਹ ਰੰਗਲੀ,
ਓਹਦੇ ਭਾਣੇ ਨੂੰ ਮਿੱਠਾ ਕਰ ਜਾਣਦਾ ਏ।

ਔਰੰਗਜ਼ੇਬ ਅਬਦਾਲੀ ਤੇ ਮੀਰ ਮੰਨੂ,
ਮੁੱਕ ਗਏ ਮੁਕਾਉਂਦੇ ਖਾਲਸੇ ਨੂੰ।
ਫਸਲ ਸਿੱਖੀ ਦੀ ਕਦੇ ਨਾ ਖਤਮ ਹੋਈ
ਖ਼ੁਦ ਝੁਕੇ, ਝੁਕਾਉਂਦੇ ਹੋਏ ਖਾਲਸੇ ਨੂੰ।

ਇਹਦੇ ਵਿੱਚ ਹੈ ਰੂਹ ਪੰਜਾਬੀਆਂ ਦੀ,
ਧੁੰਮਾਂ ਕੁਲ ਸੰਸਾਰ ਤੇ ਪਾਈ ਜਾਵੇ।
ਜਿੱਥੇ ਜਿੱਥੇ ਵੀ ਏਸ ਨੇ ਪੈਰ ਧਰਿਆ,
ਸ਼ਾਨ ਕੌਮ ਦੀ ਉੱਥੇ ਵਧਾਈ ਜਾਵੇ।

ਬਾਣੀ ਬਾਣੇ ਨੂੰ ਕਰੇ ਪਿਆਰ ਜਿਹੜਾ,
ਉਹੀ ਖਾਲਸਾ ਪਿਤਾ ਦਸ਼ਮੇਸ਼ ਦਾ ਏ।
‘ਭੁੱਲ, ਨਸ਼ਿਆਂ ਨੂੰ ਕਦੇ ਨਾ ਹੱਥ ਲਾਉਣਾ’,
ਹੁਕਮ ਗੁਰੂ ਦਾ ਮਿਲਿਆ ਹਮੇਸ਼ ਦਾ ਏ।

ਅੱਜ ਖਾਲਸੇ ਦੇ ਇਸ ਜਨਮ ਦਿਹਾੜੇ,
ਪ੍ਰਣ ਗੁਰੂ ਨਾਲ ਕੀਤਾ ਨਿਭਾ ਲਈਏ।
ਖ਼ਾਲਸ ਬਣੇ ਸਾਂ,ਰਹਾਂਗੇ ਸਦਾ ਖ਼ਾਲਸ,
ਪੱਕਾ ਮਨ ਅੱਜ ‘ਦੀਸ਼’ ਬਣਾ ਲਈਏ।
***

ਖ਼ਾਲਸਾ ਸਾਜਨਾ ਦਿਵਸ ਤੇ ਵਿਸ਼ੇਸ਼ : 
ਖ਼ਾਲਸੇ ਦਾ ਰੁਤਬਾ ਬੜਾ ਮਹਾਨ ਹੈ (ਗੀਤ)

ਖ਼ਾਲਸੇ ਦਾ ਰੁਤਬਾ ਬੜਾ ਮਹਾਨ ਹੈ।
ਖ਼ਾਲਸੇ ਦੀ ਜੱਗ ਚ ਨਿਰਾਲੀ ਸ਼ਾਨ ਹੈ।

ਖੰਡੇ ਵਾਲੀ ਧਾਰ ਤੇ ਸਜਾਇਆ ਏਸ ਨੂੰ
ਤੇਗਾਂ ਨਾਲ ਗਿਆ ਅਜ਼ਮਾਇਆ ਏਸ ਨੂੰ
ਛੱਡ ਕੇ ਨਾ ਭੱਜਦਾ ਕਦੇ ਮੈਦਾਨ ਹੈ
ਖ਼ਾਲਸੇ ਦਾ ਰੁਤਬਾ ਬੜਾ ਮਹਾਨ ਹੈ।

ਪਰਮਾਤਮ ਕੀ ਮੌਜ ਪ੍ਰਗਟਿਆ ਖਾਲਸਾ
ਗਿੱਦੜਾਂ ਤੋਂ ਸ਼ੇਰ ਬਣ ਗਿਆ ਖਾਲਸਾ
ਖੰਡੇ ਵਾਲੀ ਪਾਹੁਲ ਦਾ ਇਹ ਵਰਦਾਨ ਹੈ
ਖ਼ਾਲਸੇ ਦਾ ਰੁਤਬਾ ਬੜਾ ਮਹਾਨ ਹੈ।

ਚੇਲਿਆਂ ਨੂੰ ਗੁਰੂ ਹੈ ਬਣਾਇਆ ਗੁਰਾਂ ਨੇ
ਨਵਾਂ ਇਤਿਹਾਸ ਹੈ ਰਚਾਇਆ ਗੁਰਾਂ ਨੇ
ਗੋਬਿੰਦ ਦੀ ਮਹਿਮਾ ਹੁੰਦੀ ਨਾ ਬਿਆਨ ਹੈ
ਖ਼ਾਲਸੇ ਦਾ ਰੁਤਬਾ ਬੜਾ ਮਹਾਨ ਹੈ

ਪਾਣੀ ਦੁਸ਼ਮਣਾਂ ਨੂੰ ਪਿਲਾਉਂਦਾ ਖ਼ਾਲਸਾ
ਭੁੱਖਿਆਂ ਨੂੰ ਰਹਿੰਦਾ ਹੈ ਰਜਾਉਂਦਾ ਖ਼ਾਲਸਾ
ਯੁੱਧ ਵਿੱਚ ਝੂਲਦਾ ਇਹਦਾ ਨਿਸ਼ਾਨ ਹੈ
ਖ਼ਾਲਸੇ ਦਾ ਰੁਤਬਾ ਬੜਾ ਮਹਾਨ ਹੈ

‘ਜਬ ਤਕ ਰਹੇਗਾ ਨਿਆਰਾ ਖ਼ਾਲਸਾ’
‘ਤਬ ਤੱਕ ਲੱਗੇਗਾ ਪਿਆਰਾ ਖ਼ਾਲਸਾ’
ਗੋਬਿੰਦ ਦਾ ‘ਦੀਸ਼’ ਏਹੋ ਫੁਰਮਾਨ ਹੈ
ਖ਼ਾਲਸੇ ਦਾ ਰੁਤਬਾ ਬੜਾ ਮਹਾਨ ਹੈ।
***
ਗੁਰਦੀਸ਼ ਕੌਰ ਗਰੇਵਾਲ ਕੈਲਗਰੀ
ਸੰਪਰਕ : +1403 404 1450

*’ਲਿਖਾਰੀ’ ਵਿਚ ਪ੍ਰਕਾਸ਼ਿਤ ਹੋਣ ਵਾਲੀਆਂ ਸਾਰੀਆਂ ਹੀ ਰਚਨਾਵਾਂ ਵਿਚ ਪ੍ਰਗਟਾਏ ਵਿਚਾਰਾਂ ਨਾਲ ‘ਲਿਖਾਰੀ’ ਦਾ ਸਹਿਮਤ ਹੋਣਾ ਜ਼ਰੂਰੀ ਨਹੀਂ। ਹਰ ਲਿਖਤ ਵਿਚ ਪ੍ਰਗਟਾਏ ਵਿਚਾਰਾਂ ਦਾ ਜ਼ਿੰਮੇਵਾਰ ਕੇਵਲ ‘ਰਚਨਾ’ ਦਾ ਕਰਤਾ ਹੋਵੇਗਾ।
****
1507
***