ਫ਼ੁਰਮਾਨ! — ਮਨਦੀਪ ਕੌਰ ਭੰਮਰਾ

ਹੇ ਮੇਰੇ ਖ਼ੁਦਾ ਰਾ…!
ਤੇਰਾ ਹਰ ਫ਼ੁਰਮਾਨ ਮੈਨੂੰ ਗਵਾਰਾ
ਤੇਰੇ ਕਦਮਾਂ ‘ਚ ਮੇਰੀ ਜੰਨਤ
ਜੰਨਤ ਤੇਰਾ ਦੁਆਰਾ
ਪੌਣਾਂ ‘ਚ ਘੁਲ਼ਿਆ ਸੰਗੀਤ ਹੈ
ਮੇਰੇ ਆਤਮੇ ‘ਚ ਤੇਰੇ ਹੀ ਅਨੁਭਵ ਦਾ ਗੀਤ ਹੈ
ਆਦਿ ਜੁਗਾਦਿ ਤੇਰੀ ਬਾਂਸੁੰਰੀ
ਤੇਰੀ ਬਾਂਸੁਰੀ ਦੀ ਚਾਰ-ਚੁਫ਼ੇਰੇ ਧੁੰਨਕਾਰ ਹੈ
ਤੂੰ ਹੀ ਆਕਾਰ ਤੇ ਨਿਰੰਕਾਰ ਹੈਂ
ਤੂੰ ਹੀ ਹੈਂ ਪ੍ਰਾਣ ਆਧਾਰਾ
ਤੂੰ ਹੀ ਸੱਚੀ ਪ੍ਰੀਤ ਹੈ
ਸੱਚੀ ਪ੍ਰੀਤ ਦੀ ਤੂੰ ਰੀਤ ਹੈਂ!

ਹੇ ਮੇਰੇ ਖ਼ੁਦਾ ਰਾ…!
ਬੱਸ ਤੂੰ ਹੀ ਹੈਂ ਮੇਰਾ ਸਹਾਰਾ
ਕਰ ਮੁਰਾਦਾਂ ਪੂਰੀਆਂ
ਤੂੰ ਹੀ ਹੈਂ ਸਭ ਕਰਣਹਾਰਾ
ਤੇਰੀ ਚਰਨਬੰਦਨਾਂ ਤੂੰ ਹੈ ਨਿਆਰਾ
ਅਸਾਂ ਨੂੰ ਤੂੰ ਹੀ ਹੈਂ ਪਿਆਰਾ
ਤੈਨੂੰ ਡੰਡਵਤੁ ਪ੍ਰਣਾਮ ਹੈ
ਇਹ ਸੱਚੀ ਆਤਮਾ ਦਾ ਸਾਰ ਹੈ
ਸਰਘੀ ਦਾ ਚਾਨਣਾਂ ਆਰ-ਪਾਰ ਹੈ
ਜਿਉਂ ਮੱਖਣ ‘ਚ ਹੈ ਸਿੰਧੂਰ ਘੁਲ਼ਿਆ
ਤਿਰੇ ਨੈਣਾਂ ‘ਚ ਜਗਦੀ ਓਹੀ ਰੌਸ਼ਨੀ
ਜੋ ਅੰਬਰੀਂ ਗੁਲਾਲ ਫ਼ੈਲਿਆ ਹੈ
ਇਹੋ ਦੇਖਦੀ ਹੈ ਮੇਰੀ ਆਤਮਾ
ਇਸ ਸੀਨੇ ‘ਚ ਭਗਤੀ ਤੇ ਪਿਆਰ ਹੈ
ਭਾਵਾਂ ਦੀ ਬੰਦਗੀ ਰੂਹ ਦਾ ਸ਼ਿੰਗਾਰ ਹੈ

ਕੇਸਰ ਦੇ ਫ਼ੁੱਲ ਖਿੜੇ ਹਨ
ਮਨ ਦੀ ਬਗ਼ੀਚੀ ਵਿੱਚ ਗੁਲਜ਼ਾਰ ਹੈ

ਮੇਰੀ ਭਗਤੀ ਦੀ ਡੂੰਘੀ ਲਿਵਤਾਰ ਸੁਣ!
ਮੇਰੀ ਰੂਹ ਇਸੇ ਨਾਲ਼ ਸਰਸ਼ਾਰ ਹੈ
ਕਵਿਤਾ ਨੇ ਹੈ ਇਹ ਜਹਾਨ ਸਿਰਜਿਆ
ਇਹ ਮੇਰੇ ਸਿਰ ਦਾ ਤੇਰਾ ਹੀ ਦਿੱਤਾ ਤਾਜ ਹੈ
ਮੈਂ ਤਾਂ ਰਹਿਮਤਾਂ ਦੀ ਮੁਹਤਾਜ ਸਾਂ
ਤੂੰ ਹੀ ਬਖ਼ਸ਼ਿਆ ਇਹ ਵਰਦਾਨ ਹੈ
ਮੇਰਾ ਹਰ ਅੱਖਰ ਤੇਰਾ ਫ਼ਰਮਾਬਰਦਾਰ ਹੈ
ਹਰ ਭਾਵ ਤੇਰਾ ਹੀ ਫ਼ੁਰਮਾਨ ਹੈ
ਰੋਮ-ਰੋਮ ਵਿੱਚ ਹੈ ਤੇਰੇ ਨਾਮ ਦਾ ਵਾਸਾ
ਮਿਰੇ ਰੋਮ-ਰੋਮ ਵਿੱਚ ਤੇਰੀ ਹੀ ਝਲਕਾਰ ਹੈ
ਨੂਰੀ ਜਲਵੇ ‘ਚ ਹੈ ਅਥਾਹ ਦਿਲਕਸ਼ੀ
ਚਿੱਤ ਵਿੱਚ ਆਤਮਿਕ ਹੁਲਾਰ ਤੇ ਦੁਲਾਰ ਹੈ

ਤੁਰੀ ਸਾਂ ਮੈਂ ਕਹਿਕਸ਼ਾਂ ਦੇ ਚਾਨਣੇ
ਸਤਰੰਗੀ ਪੀਂਘ ਜਿਹੇ ਸੁਪਨੇ ਦਾ ਸੰਸਾਰ ਹੈ
ਹਕੀਕਤ ਇਸ ਦਿਲ ਦੀ ਜਾਣਦਾ
ਤੂੰ ਹੀ ਖ਼ੁਦਾਇਆ ਤੂੰ ਹੀ ਦਿਲਦਾਰ ਹੈਂ
ਤੇਰੇ ਨਾਲ਼ ਵੱਸਦਾ ਮੇਰਾ ਇਹ ਸੁਖੀ ਸੰਸਾਰ ਹੈ
ਤੂੰ ਦੇਹ ਫ਼ੁਰਮਾਨ ਮੈਨੂੰ ਨਿੱਤ ਨਵਾਂ
ਤੇਰੇ ਹੀ ਫ਼ੁਰਮਾਨ ਵਿੱਚ ਝੁਕਿਆ
ਮੇਰੀ ਹਰ ਸੋਚ ਦਾ ਆਸਮਾਨ ਹੈ!
***

ਮਨਦੀਪ ਕੌਰ ਭੰਮਰਾ
“ਫ਼ੁਰਮਾਨ” ਵਿੱਚੋਂ (2026 ਵਿੱਚ ਛਪਣ ਵਾਲ਼ੀ ਪੁਸਤਕ)

*’ਲਿਖਾਰੀ’ ਵਿਚ ਪ੍ਰਕਾਸ਼ਿਤ ਹੋਣ ਵਾਲੀਆਂ ਸਾਰੀਆਂ ਹੀ ਰਚਨਾਵਾਂ ਵਿਚ ਪ੍ਰਗਟਾਏ ਵਿਚਾਰਾਂ ਨਾਲ ‘ਲਿਖਾਰੀ’ ਦਾ ਸਹਿਮਤ ਹੋਣਾ ਜ਼ਰੂਰੀ ਨਹੀਂ। ਹਰ ਲਿਖਤ ਵਿਚ ਪ੍ਰਗਟਾਏ ਵਿਚਾਰਾਂ ਦਾ ਜ਼ਿੰਮੇਵਾਰ ਕੇਵਲ ‘ਰਚਨਾ’ ਦਾ ਕਰਤਾ ਹੋਵੇਗਾ।
***
1817
***